Терма жамоалар ўртасида теннис бўйича норасмий жаҳон чемпионати ҳисобланган Девис кубоги мусобақасининг 2017 йилдаги илк босқичида Ўзбекистон терма жамоаси Жанубий Кореяни мағлуб этишга муваффақ бўлди.
Осиё/Океания минтақасида иштирок этаётган ушбу терма жамоалар ўртасидаги ўйин Кореяда бўлиб ўтаётган бўлиб, дастлабки икки кун натижаларига кўра ҳамюртларимиз 2:1 ҳисобида олдинга чиқиб олганди.
Бугун мусобақада яна яккаликлар ўртасида баҳслар бошланди. Дастлаб Ўзбекистоннинг биринчи ракеткаси Денис Истомин рақибнинг 1-рақамли теннисчи Хён Чунгга қарши кортга чиқиши керак эди. Бироқ кореяликлар, Хён Чунг дастлабки 2 кун давомида 5та сетли ўйинларда иштирок этгани учун бўлса керак, унинг ўрнига жамоанинг учинчи теннисчиси Сун Ву Квонни қўйишга қарор қилишди.
Ушбу теннисчи биринчи сетда Истоминни мағлуб этишга муваффақ бўлди — 6:3. Иккинчи бўлимда ҳам олдинда бораётганди, бироқ Денис қайта брейкни амалга оширди ва сетни тай-бреккача олиб бориб, унда 7-5 ҳисобида ғалаба қозонди.
Учинчи сетда ҳамюртимиз осонгина ғалаба қозонди — 6:2. Тўртинчи сетда Истомин брейк ҳисобига олдинда бораётганди. Аммо Сун Ву Квон ҳисобни тенглаштирди ва баҳс яна тай-бреккача давом этди. "Лотерея"да мезбон спортчиси осонликча "жон" беришни истамади. У ҳамюртимизнинг нақ 5 марта матчболдан фойдаланишига йўл қўймади. Ниҳоят, Истомин олтинчи имкониятдан самарали фойдаланди — 14:12!
Натижада сет, матч ва тўқнашув тақдири ҳал бўлди. Жанубий Корея - Ўзбекистон - 1:3.
Бугун Дук Хи Ли ва Санжар Файзиев ўртасидаги ўйин бўлиб ўтиши режалаштирилган.
Ўзбекистон теннис терма жамоаси кейинги босқичда Янги Зеландия - Ҳиндистон жуфтлиги ғолибига қарши баҳс олиб боради. Бу тўқнашув 7-9 апрель кунлари бўлиб ўтади.
Девис кубоги. Осиё/Океания минтақаси
Сун Ву Квон - Денис Истомин - 1:3 (3-6, 6-7 (5), 2-6, 6-7 (12)).
