Italiya A seriyasining 23-turidan o‘rin olgan o‘yinda «Lasio» futbolchisi Marko Parolo «Peskara» darvozasini uch bora boshi bilan ishg‘ol qildi.

Shu asnoda e’tiboringizga ushbu mavsumda Yevropa kuchli beshlik chempionatlarida bosh bilan eng ko‘p gol urgan futbolchilar o‘nligini taqdim etamiz. Nihoyat ushbu to‘purarlar ro‘yxatida Messi ham, Ronaldu ham yo‘q.

O‘ninchi o‘rindan bir yo‘la ikki futbolchi joy olgan: «Monako» futbolchisi Valer Jermen va «Torino» hujumchisi Andrea Belotti boshi bilan raqiblari darvozasiga 11 martadan zarba berib, ulardan 4 tasini golga aylantira olgan. 8-9-o‘rinlardagi «Everton» hujumchisi Romelu Lukaku va Dortmundning «Borussiya»si to‘purari Per-Emerik Obameyang bosh bilan urilgan 4 ta golni 9 urinishdayoq uddalagan.

Yettinchi o‘rinda «Tottenhem» futbolchisi Dele Alli bo‘lib, uning bosh bilan yo‘llagan besh zarbasidan to‘rttasi aniq chiqqan. Oltinchi o‘rindagi «Inter» yetakchisi, to‘purari va sardori Mauro Ikardi esa bosh bilan zarba yo‘llashda ancha yuqori ko‘rsatkichga ega: 27 ta. Biroq ularning faqatgina beshtasi golga aylangan.

Beshinchi o‘rindagi «Vest Bromvich» hujumchisi Salomon Rondon ham bosh bilan zarba yo‘llashda Ikardidan qolishmagan: 23 ta. U ham argentinalik hujumchi singari ushbu zarbalarning beshtasini golga aytira olgan. Boshi bilan aynan shuncha gol urgan «Real Sosedad» to‘purari Villian Jozega esa bunga erishish uchun 16 urinish kifoya qilgan.

Kuchli uchlikni boshi bilan 11 urinishda 5 ta gol urgan «Arsenal»ning fransiyalik hujumchisi Olivye Jiru ochib beradi. Ikkinchi o‘rinda tabiiyki Madridning «Real» klubi himoyachisi va sardori Serxio Ramos turibdi: uning boshi bilan yo‘llagan 10 zarbasidan 5 tasi golga aylangan. Nihoyat bu boradagi yetakchi «Vest Hem» hujumchisi Maykl Antonio bo‘lib, uning boshi bilan yo‘llagan 14 zarbasidan 6 tasi hisob o‘zgarishiga sabab bo‘lgan.