Италия А сериясининг 23-туридан ўрин олган ўйинда «Лацио» футболчиси Марко Пароло «Пескара» дарвозасини уч бора боши билан ишғол қилди.
Шу аснода эътиборингизга ушбу мавсумда Европа кучли бешлик чемпионатларида бош билан энг кўп гол урган футболчилар ўнлигини тақдим этамиз. Ниҳоят ушбу тўпурарлар рўйхатида Месси ҳам, Роналду ҳам йўқ.
Ўнинчи ўриндан бир йўла икки футболчи жой олган: «Монако» футболчиси Валер Жермен ва «Торино» ҳужумчиси Андреа Белотти боши билан рақиблари дарвозасига 11 мартадан зарба бериб, улардан 4 тасини голга айлантира олган. 8-9-ўринлардаги «Эвертон» ҳужумчиси Ромелу Лукаку ва Дортмунднинг «Боруссия»си тўпурари Пер-Эмерик Обамеянг бош билан урилган 4 та голни 9 уринишдаёқ уддалаган.
Еттинчи ўринда «Тоттенҳем» футболчиси Деле Алли бўлиб, унинг бош билан йўллаган беш зарбасидан тўрттаси аниқ чиққан. Олтинчи ўриндаги «Интер» етакчиси, тўпурари ва сардори Мауро Икарди эса бош билан зарба йўллашда анча юқори кўрсаткичга эга: 27 та. Бироқ уларнинг фақатгина бештаси голга айланган.
Бешинчи ўриндаги «Вест Бромвич» ҳужумчиси Саломон Рондон ҳам бош билан зарба йўллашда Икардидан қолишмаган: 23 та. У ҳам аргентиналик ҳужумчи цингари ушбу зарбаларнинг бештасини голга айтира олган. Боши билан айнан шунча гол урган «Реал Соседад» тўпурари Виллиан Жозега эса бунга эришиш учун 16 уриниш кифоя қилган.
Кучли учликни боши билан 11 уринишда 5 та гол урган «Арсенал»нинг францийалик ҳужумчиси Оливье Жиру очиб беради. Иккинчи ўринда табиийки Мадриднинг «Реал» клуби ҳимоячиси ва сардори Серхио Рамос турибди: унинг боши билан йўллаган 10 зарбасидан 5 таси голга айланган. Ниҳоят бу борадаги етакчи «Вест Ҳэм» ҳужумчиси Майкл Антонио бўлиб, унинг боши билан йўллаган 14 зарбасидан 6 таси ҳисоб ўзгаришига сабаб бўлган.
