Osiyo Chempionlar Ligasi pley-off bosqichida Qarshining “Nasaf” jamoasi safarda Saudiya Arabistoni vakili “Al-Fath” bilan o‘zaro bahs olib bordi. Musobaqaning guruh yo‘llanmasi uchun kechgan o‘yinda saudiyaliklar 1:0 hisobida zafar quchdi.

Uchrashuv yakunlariga bag‘ishlangan matbuot anjumada qarshiliklar bosh murabbiyi Ro‘ziqul Berdiyev ishitrok etdi va o‘yin haqida quyidagi fikrlarini bildirib o‘tdi.

— Bugungi uchrashuv taqdirini standartdan urilgan bitta gol hal qildi. Uchrashuvga to‘xtaladigan bo‘lsam, “Al-Fath” biz kutgan o‘yinni ko‘rsatdi. Kecha aytib o‘tganimdek, raqibimizda jamoaviy o‘yin yaxshi, qolaversa Andre Monteyrodek shaxsiy mahoratga ega futbolchilar bor. Aynan ushbu o‘yinchining “Al-Fath”ga bugun foydasi katta bo‘ldi.

Rejamiz bo‘yicha, birinchi bo‘limda darvozamiz dahlsizligini saqlab qolib, yaratilgan vaziyatlardan unumli foydalanish edi. Afsuski, birinchi bo‘lim oxirlarida Dragan Cheran gol urish uchun mavjud imkoniyatdan foydalana olmadi. Agar birinchi bo‘lib gol urganimizda, o‘yin taqdiri boshqacha bo‘lishi ham mumkin edi. Umuman “Al-Fath” himoyachilari ham bugun yaxshi o‘yin namoyish etishdi. Qolaversa, bugungi uchrashuv teng kurashlar ostida kechdi. Omad esa “Al-Fath” tomonida bo‘ldi, — deydi Ro‘ziqul Sa’dullayevich.