Осиё Чемпионлар Лигаси плей-офф босқичида Қаршининг “Насаф” жамоаси сафарда Саудия Арабистони вакили “Ал-Фатҳ” билан ўзаро баҳс олиб борди. Мусобақанинг гуруҳ йўлланмаси учун кечган ўйинда саудияликлар 1:0 ҳисобида зафар қучди.
Учрашув якунларига бағишланган матбуот анжумада қаршиликлар бош мураббийи Рўзиқул Бердиев ишитрок этди ва ўйин ҳақида қуйидаги фикрларини билдириб ўтди.
— Бугунги учрашув тақдирини стандартдан урилган битта гол ҳал қилди. Учрашувга тўхталадиган бўлсам, “Ал-Фатҳ” биз кутган ўйинни кўрсатди. Кеча айтиб ўтганимдек, рақибимизда жамоавий ўйин яхши, қолаверса Андре Монтейродек шахсий маҳоратга эга футболчилар бор. Айнан ушбу ўйинчининг “Ал-Фатҳ”га бугун фойдаси катта бўлди.
Режамиз бўйича, биринчи бўлимда дарвозамиз даҳлсизлигини сақлаб қолиб, яратилган вазиятлардан унумли фойдаланиш эди. Афсуски, биринчи бўлим охирларида Драган Черан гол уриш учун мавжуд имкониятдан фойдалана олмади. Агар биринчи бўлиб гол урганимизда, ўйин тақдири бошқача бўлиши ҳам мумкин эди. Умуман “Ал-Фатҳ” ҳимоячилари ҳам бугун яхши ўйин намойиш этишди. Қолаверса, бугунги учрашув тенг курашлар остида кечди. Омад эса “Ал-Фатҳ” томонида бўлди, — дейди Рўзиқул Саъдуллаевич.
