Mana, mashhur Patrik Klyuyvertning o‘g‘li «Ayaks» safida o‘z debyutini nishonladi, Diyego Simeonening zurriyodi - Jovanni esa allaqachon «Jenoa» uchun biri-biridan muhim gollar urishni boshladi. Madridning «Real» klubida Zayniddin Zidanning butun boshli oilasi shug‘ullanmoqda. Soccer.ru sayti Jastin Klyuyvert debyuti munosabati bilan mashhur futbolchilarning mashhurlikka intilayotgan farzandlariga yana bir bora e’tibor burdi. Albatta, quyidagi ro‘yxatga Kasper Shmeyxel va Denis Cherishev kabilarni ham kiritish mumkin edi. Biroq ular ancha ulg‘ayib qolishdi. Ya’ni endilikda taniqli otalari obro‘si bu futbolchilarga ortiqcha bosim yuklamasa kerak. Xullas, bugun faqat 21 yoshdan kichik yigitchalar haqida so‘z yuritiladi.
Jo van der Sar («Ayaks»; Gollandiya) - 18 yosh, darvozabon
Ma’lumki, «MYU»da dong taratgan taniqli posbon Peter Shmeyxelning o‘g‘li Kasper otasi izidan borib, darvozabonlikni tanladi va o‘tgan yili APL chempionidek yuksak maqomga sazovor bo‘ldi. Biroq «Lester»ning daniyalik golkiperi allaqachon 30 yoshni qoralab qolganini unutmaslik kerak. «MYU»ning yana bir mashhur kiperi Edvinning o‘g‘li esa endi 18 yoshini qarshiladi va kelajagi hali oldinda. Ta’kidlash joiz, Jo 2013 yili kamtarin «Nordviyk»dan «Ayaks» akademiyasiga ko‘chib o‘tdi. Ayni payt esa Amsterdam jamoasi tizimidagi U-19 jamoasi darvozasiga javobgar sanaladi. Klub bosh direktori sifatida ishlayotgan Edvin van der Sar o‘g‘lining harakatlariga hozircha faqat tanqidiy baho berish bilan ovora. Chunki sobiq golkiper yaxshi biladiki, van der Sar familiyasiyoq o‘g‘lining zimmasiga og‘ir mas’uliyat yuklaydi. Demakki, yigitchani shunga yarasha, jiddiy toblab borish zarur.
Kristian Maldini («Redjina»; Italiya) - 20 yosh, markaziy himoyachi
Italiya futbolidagi asosiy sulolalardan birini bilmaydigan muxlis topilmasa kerak. Zero, Maldini familiyasi «Milan» klubida shunchalik obro‘-e’tibor va hurmatga egaki, uning sohiblariga doimo 3-raqam ishonib topshiriladi - bu kafolanlangan. Kristian Maldini - Paoloning o‘g‘li yoxud Chezarening nabirasi. U ham vaqtida «rossonerlar» yoshlar jamoasida to‘p surib (3-raqamda, albatta), hatto sardorlik darajasiga ko‘tarilgan. Ammo o‘tgan yili yozda «Redjina» safiga qo‘shilib, bu klubdan ijara kelishuvi asosida Maltaga yo‘l oldi. Tabiiyki, bunday yo‘nalish 20 yoshli Kristian uchun unchalik muvaffaqiyatli hisoblanmaydi. Biroq tashvishlanishga hojat yo‘q: Paoloning kichik o‘g‘li, 2001 yili tug‘ilgan Daniel ayni payt aynan «Milan» akademiyasida tahsil olmoqda.
Nayl Kioun («Reding»; Angliya|Ir-landiya) - 21 yosh, markaziy himoyachi
«Arsenal» klubi sharafini himoya qilib, 400tadan ortiq rasmiy o‘yinda maydonga tushgan va afsonaga aylangan Martin Kioun zurriyodi sekin-asta quyidan yuqoriga intilmoqda. Qizig‘i shundaki, Martin faoliyatini aynan «Reding»da yakunlagandi. Nayl esa barchasini shu klubda boshladi. Kichik Kioun va «Reding» o‘rtasidagi shartnoma 2018 yilning yozigacha amalda bo‘ladi. Ehtimol, Nayl orzulariga to‘liq erishish uchun kattaroq jamoa safiga ko‘chib o‘tishi kerakdir? Aytgancha, Martin vaqtida Angliya milliy jamoasi sharafini himoya qilgandi, o‘g‘li esa Irlandiya termasini tanladi. Bilmadik, kelajak voqealari qanday rivojlanadi-yu, ammo fakt shuki, kichik Kioun «yashil qo‘shin»ning yoshlar jamoasida bir marta maydonga tushishga ulgurdi.
Jastin Klyuyvert («Ayaks»; Gollandiya) - 17 yosh, qanot hujumchisi
Patrik Klyuyvertning o‘g‘li 2017 yilning 15 yanvarida, ya’ni kuni kecha eredivizion doirasidagi o‘yin-da ilk marta ko‘rinish berdi. Aniqrog‘i, u «Ayaks»ning «Zvolle»ga qarshi o‘yini 39-daqiqasida jarohatlangan Amin Yunes o‘rnini egalladi. E’tiborlisi, kichik Klyuyvert otasidek markaziy hujumchi rolini bajarishni emas, balki qanotda to‘p surishni ma’qul ko‘rmoqda. Chunki Jastin ancha tezkor va aynan qanotda o‘zini erkinroq sezadi. Darvoqe, u bir jihat bo‘yicha hozirning o‘zida otasini ortda qoldirishga erishdi: erta debyut masalasida.
Timoti Vea («PSJ»; AQSH|Liberiya) - 16 yosh, hujumchi
Jastin Amsterdamda to‘p sura boshlagan bir vaqtda uning otasi - Patrik «PSJ» sport direktori lavozimini egallagancha Timoti Vea harakatlarini kuzatmoqda. Ha, 1995 yili «Oltin to‘p» sovrinini qo‘lga kiritgan mashhur Jorj Vea zurriyodi Klyuyvert nazoratida shug‘ullanmoqda. Timotining hali o‘smir ekanligi va hozirgacha qayd etgan natijalarini e’tiborga olib, bemalol taxmin qilish mumkin: uni porloq kelajak kutmoqda. Chunonchi, yigitcha parijliklar safida o‘smirlar o‘rtasidagi Chempionlar Ligasi doirasida «Ludogores»ga qarshi kechgan bitta o‘yinda naq 5ta gol urishni epladi. Agar Timoti xuddi shunday rivojlanish va o‘sishda davom etsa, yana 1-2 yildan so‘ng «kichik Vea» maqomida butun dunyoga tanilsa, ajabmas.
Rivaldinyo («Internasyonal»; Braziliya) - 21 yosh, hujumchi
Rivaldo o‘z o‘g‘li bilan bitta jamoa - «Moji Mirim»da to‘p surishga ulgurdi. Ammo keyinchalik yigitcha otasi qanotidan ajralib, shaxsiy faoliyatini mustaqil rivojlantirishga qaror qildi. Shu tariqa Rivaldinyo 2015-2016 yillar mavsumida Portugaliyaning «Boavishta»si safida o‘ynadi. Lekin bu jamoada o‘zini ko‘rsatishga ulgurmay turib, «Internasyonal» qiziqishlari doirasiga tushdi. Qarangki, Braziliyaning eng ilg‘or jamoalaridan biri o‘z tarixida ilk marta elitadan tushib ketgach, aynan iste’dodli mahalliy yoshlar yordamida yana oliy ligaga qaytmoqchi bo‘lyapti. Tabiiyki, bu Rivaldinyo uchun o‘ziga xos imkoniyatdir. Muhimi, yigitchaning texnikasi havasga arziydigan darajada. Biroq ochig‘ini aytish kerak, Rivaldinyoda otasiga xos mehnatsevarlik va sabr xislatlari yetishmayapti, chog‘i. Ehtimol, bu kamchiliklar ulg‘aygani sari yo‘qolib borar...
Enso Zidan Fernandes («Real»; Fransiya|Ispaniya) - 21 yosh, hujumkor yarim himoyachi
Barchaga ma’lum - Ensoning otasi ayni vaqt «Real» bosh murabbiyi vazifasini munosib bajaryapti. Aynan Zayniddinning qarori bilan Enso yaqinda «Qirollik klubi»da ilk rasmiy o‘yinini o‘tkazdi. Qolaversa, u «Qirol kubogi» doirasida «Leones»ga qarshi kechgan ushbu uchrashuvda raqib darvozasini nishonga olishni ham uddaladi. Biroq tan olish lozim, Enso 22 yoshga qadam qo‘yayotgan bo‘lsa hamki, hanuz «Kastilya» darajasida yuribdi. Aftidan, uning uchun o‘z baxtini Madriddan tashqarida qidirib ko‘rish yaxshi, shekilli.
Yanis Xadji («Fiorentina»; Ruminiya|Turkiya) - 18 yosh, hujumkor yarim himoyachi
Yanis katta futboldagi faoliyatini Ruminiyaning «Vitorul» klubida, «Karpat Maradonasi» laqabi bilan tanilgan otasi - George Xadji qo‘l ostida boshladi. Muhimi, yigitchaning maydondagi harakatlari shunchalik e’tiborni tortdiki, Yevropadagi ko‘pgina mashhur klublar unga darhol alohida qiziqish bilan qarashdi. Da’vogarlar orasida esa Italiyaning «Fiorentina» klubi qat’iyatliroq va jur’atliroq chiqib, Yanis uchun 2 million yevro sarflashdan tiyilmadi. Shunday qilib, kichik Xadji o‘tgan yilning oktyabrida «A» seriyasida debyut qildi, ya’ni «Kalyari»ga qarshi o‘yinda maydonga tushdi.
Jovanni Simeone («Jenoa»; Argentina|Ispaniya) - 21 yosh, hujumchi
Yanis hozircha Italiya chempionatida debyutini nishonlaganidan quvonib yurayotgan bo‘lsa, «Atletiko» murabbiyining o‘g‘li hisoblangan Jovanni «A» seriyasida muntazam ravishda maydonga tushib, «Jenoa» uchun ketma-ket gollar urmoqda: 18ta o‘yinda 7ta gol. Eslatish o‘rinli, turinliklar Jovannini avgust oyida 3 million yevro evaziga xarid qilishgandi. Hozirga kelib esa, yosh futbolchining narxi 8 millionga ko‘tarildi.
Xorxe Gonsales Sans («Fordxem», Nyu-York; Ispaniya) - 16 yosh, hujumchi
Aytishlaricha, Xorxe o‘yin harakati bo‘yicha otasi - Raul Gonsalesning o‘zginasi ekan. Yigitcha amaldagi futbolchilardan esa, Alvaro Morata uslubiga ko‘proq maftun. Shunga qaramay, Xorxening kelajagi haqida hozirdan bir narsa deyish qiyin. Zero, u futboldagi ilk saboqlarni Madrid emas, Nyu-Yorkda o‘zlashtirdi. Marca nashrining ta’kidlashicha, Xorxe AQSH talabalar ligasidagi eng yaxshi to‘purarlardan biri bo‘lib turibdi. Aytgancha, Raulning yana bir o‘g‘li - 13 yoshli Ugo «Nyu-York Siti» akademiyasida tahsil olmoqda. Kim biladi, ikki o‘g‘lidan biri balki o‘zi kabi mohir goleador bo‘lib yetishar hali...
