Ikki hafta mobaynida Turkiyaning Antaliya shahrida o‘quv-mashg‘ulot yig‘ini o‘tkazgan “Lokomotiv” jamoasi vakillari 13 fevral kuni yurtimizga qaytishgan edi. Bir kunlik qisqa dam olishdan so‘ng “temiryo‘lchilar” yana mashg‘ulotlarni boshlab yuborishdi.
Bugun “Lokomotiv” futbolchilari o‘z qarorgohida mashg‘ulot o‘tkazishdi. Mashg‘ulotda barcha futbolchilar ishtirok etishdi. Dastavval yengil yugurib olingach chigalyozdi mashqlari bajarildi. So‘ng esa to‘p bilan muomala mashqlariga o‘tildi.
Ta’kidlash joizki, jamoamiz 18 fevralga qadar Toshkentda shug‘ullanadi. Keyin esa Osiyo Chempionlar Ligasi 2017 yilgi mavsumi guruh bosqichi 1-tur o‘yinini o‘tkazish uchun Saudiya Arabistoniga yo‘l oladi. “Al Taavon” jamoasiga qarshi bahs 20 fevral kuni Burayda shahrida bo‘lib o‘tadi.
