Britaniyaning BBC telekanali «Rus bezorilari armiyasi» hujjatli filmini namoyish qildi.
Unda JCH-2018 paytidagi tartibsizliklarni uyushtirishga tayyorgarlik ko‘rayotgan rus futbol fanatlari haqida lavhalar namoyish etildi.
Filmda, Yevro-2016 paytida rus bezorilari tomonidan ingliz muxlislariga uyushtirilgan hujumlar natijasida, ko‘plab odamlarning jarohat olishi, ikki nafar muxlisning koma holatiga tushib qolishi voqealari aks ettirilgan.
Film rejissyori Aleks Stokli fon Statser Rossiyaga tashrif buyurib, fanatlarning mashhur «Oryol shahri qassoblari», «Gladiatorlar» guruhlarining yetakchilari bilan uchrashib, ulardan intervyu olgan. Unda fanatlar Rossiyada o‘tkaziladigan JCH o‘yinlariga puxta tayyorgarlik ko‘rayotgani, ingliz muxlislariga hujum uyushtirish rejalashtirilayotganini aytishgan. Muallif Rostov-na-Donu shahriga ham borib, fanatlarning mashg‘ulotlari, janglarga tayyorgarligini suratga olgan.
Filmning asosiy maqsadi – Yevropadan tashrif buyuradigan muxlislarni rus bezorilarining rejalaridan ogohlantirish bo‘lgan.
