"PSJ"ga qarshi o‘yinda qabul qilingan yirik hisobdagi mag‘lubiyatdan keyin "Barselona" futbolchilari ruhiy jihatdan o‘zlariga kela olishmayapti. "Leganes"ga qarshi bo‘lib o‘tgan La liganing 23-tur bahsi buni ko‘rsatib berdi.

Kataloniyalar 4-daqiqadayoq hisobni ochishga muvaffaq bo‘lishdi. Neymar-Suares-Messi kombinasiyasidan keyin Lionel yaqin masofadan darvozani ishg‘ol qildi. Shundan so‘ng bahs "ko‘k-anorranglilar"ning yirik hisobdagi g‘alabasi bilan yakunlanadigandek fikr uyg‘ondi. Ammo, aksincha, shundoq ham ruhan g‘amgin bo‘lgan "Barselona" futbolchilari xotirjamlikka berilishdi. Enrike va o‘yinchilar bitta gol farqidagi ustunlik juda qaltis ekanini tushunishmadi.

Mezbonlar tomonidan yaratilgan kam sonli hujumlar golga aylantirilmadi. "Leganes" esa imkon tug‘ilishi bilan oldinga intila boshladi. Bir nechta vaziyatda ter Shtegen jamoasini qiyin vaziyatlarda qutqardi.

O‘yinning 71-daqiqasiga kelib, mehmonlar Serxio Robertoni xato qilishga majbur qilishdi va Unay Lopes 16 metrdan zarba berib, darvozani ishg‘ol qildi.

Shundan so‘ng "Barsa" futbolchilari jonlanib qolishdi, murabbiy markazni kuchaytirish uchun 3ta o‘zgarishni amalga oshirdi. O‘yinning so‘nggi daqiqasida Neymarning faolligi evaziga maydon egalari penalti ishlashga muvaffaq bo‘lishdi. Messi kuchli zarba bilan darvozga to‘pni joyladi.

Qo‘shib berilgan daqiqalarda "Leganes" futbolchisi Nabiyl el-Jar jarima maydonchasi tashqarisidan kuchli zarba berib, darvozani ishg‘ol qilishiga bir baxya qoldi. To‘p yo‘nalishi biroz noaniq bo‘ldi.

Agar "Barselona" bugun ochko yo‘qotganida La ligada chempionlik uchun intriga butunlay "o‘lgan" bo‘lardi. "Ko‘k-anorranglilar" qayta tiklanishi uchun futbolchilarda shiddat va kuchli istak uyg‘onishi kerak. Futbolchilarni murabbiy uyg‘otishi lozim.

Ispaniya La ligasi, 23-tur
Barselona – Leganes 2:1 (1:0, 1:1)
Gollar: 1:0 – 4 Messi, 1:1 – 71 Lopes, 2:1 – 90, penalti Messi.
Barselona – ter Shtegen, MatYE, Umtiti, Din (Alba, 81), Serdji Roberto, Rakitich, Andre Gomesh (Inyesta, 80), Rafinya (Denis Suares, 80), Neymar, Messi, Suares.
Leganes – Yago Errerin, Mantovani, Riko, Tito, Siovas (Insua, 87), Pires, Moran (Lopes, 65), Shimanovski (Machis, 70), Adames, El-Jar, Gerrero.
Ogohlantirishlar: Suares (46), Mantovani (55), Siovas (87), Adames (90).