Futbol muxlislari diqqatiga! Avval xabar berganimizdek, 22 fevral kuni UZREPORT TV telekanali soat 22:00da Yevropa Ligasidan o‘rin olgan “Sent-Etyen” – “Manchester Yunayted”, hamda soat 00:45da Chempionlar ligasining “Portu” – “Yuventus” o‘yinlarini jonli efirda namoyish etishni rejalashtirmoqda.
Shuningdek, shu kuni Ispaniya chempionatining 16-turidan o‘rin olgan “Valensiya” va “Real Madrid” klublari o‘rtasidagi qoldirilgan o‘yini ham o‘tkaziladi va uning boshlanish vaqti soat 22:45ga belgilangan.
Telekanalimizga muxlislardan kelib tushgan ko‘plab murojatlarda Ispaniya La Ligasining ushbu o‘yinini ham efirga uzatish so‘ralgan. Muxlislar iltimosini inobatga olgan holda, shu kuni UZREPORT TV maxsus futbol marafonini o‘tkazishga qaror qildi.
“Sent-Etyen” – “Manchester Yunayted” uchrashuvining birinchi bo‘limi tugagach, “Valensiya” va “Real Madrid” o‘yini start oladi va biz ikki uchrashuvni onlayn tarzda namoyish qilamiz. Ya’ni, tomoshabinlar ikkala uchrashuvdagi muhim vaziyatlarni jonli efir orqali ko‘rib borishadi.
“Valensiya” va “Real Madrid” uchrashuvi yakuniga yetgach, muxlislar Chempionlar ligasidan o‘rin olgan “Portu” – “Yuventus” uchrashuvidan jonli efirda bahramand bo‘lishadi.
Bu sa’yi-harakatlar yurtimiz futbol muhlislarining mazkur o‘yinlarga bo‘lgan yuksak qiziqishidan kelib chiqqan holda amalga oshirilmoqda.
UZREPORT TV telekanalini kuzatishda davom eting!
