Italiya futbol federasiyasi (IFF) «Inter» klubi va uning sardori Mauro Ikardini jarimaga tortdi.

Gap shundaki, Ikardi yaqinda avtobiografik kitobini nashrdan chiqarib, unda 2015 yilda yuz bergan, «Sassuolo» klubiga qarshi o‘yindan keyingi holatni yoritib o‘tgandi.

Futbolchining gapiga ko‘ra, o‘yindan keyin u futbolkasini tribunadagi bolakayga sovg‘a qilgan. Biroq, fanatlardan biri uni tortib olib, futbolchining o‘ziga qarata otgan. Argentinalik esa fanatni kurakda turmas gaplar bilan so‘kkan.

IFF bu voqeani o‘rganib chiqib, futbolchini haqoratomuz va behayo, shuningdek zo‘ravonlikka olib keluvchi so‘zlarning ishlatilishida aybdor deb topdi. Natijada, Ikardi 13,5 ming yevro, «Inter» esa 6,5 ming yevro miqdorida jarimaga tortildi.