Massimiliano Allegri jamoasida yangi taktik sxemani qo‘llay boshlaganidan beri, “Yuventus” yutishdan charchamayapti. Muhimi, eng iste’dodli a’zosi Paulo Dibala yangi o‘yin sxemasida o‘zini ajoyib his qilmoqda.
22 yanvardan boshlab, “Yuventus” 4-2-3-1 taktik sxemasini qo‘llay boshladi. Bundan tashqari, jamoaning o‘yin davomida 3-5-2, 4-3-3 va hatto 4-4-2 o‘yin sxemasida o‘ynay olishi jamoaning samaradorligini yanada oshirib yubordi. Kuadrado, Dibala, Manjukich va Iguain kabi hujumkor futbolchilari uchun Massimiliano Allegri nihoyat yechim topganday. Mavsum boshida, “keksa sinyora” yetakchi a’zolarining jarohatlari bois mukammal o‘yin namoyish eta olmagan bo‘lsa, hozirga kelib tarkib ancha optimal ko‘rinish hosil qilgan.
Iguain: “Yuventus” Chempionlar Ligasini yutishi mumkin
«Fiorentina»dan uchralgan mag‘lubiyatdan keyin «Yuventus” “Lasio”, “Milan”, “Sassuolo”, “Inter”, “Krotone”, “Kalyari”, “Palermo” ustidan g‘alaba qozondi. Bu jamoalar turinliklarning yangi formulasiga qarshi biror chora topa olmadilar. Ushbu o‘yin tizimining o‘zgarishi sababini jamoa ustozi Allegri quyidagicha tushuntirib o‘tdi: “O‘zgarishlar, yangiliklar jamoaga shiddat olib keladi. Biz ancha payt o‘z uslubimizni saqlab kelgandik. Shogirdlarim buni bilishadi, ular aqlli”.
Jamoadagi o‘zgarish Klaudio Markizio yo‘qligida amalga oshirilgan edi. Futbolchi maydonga qaytgan, biroq yirik uchrashuvlarda maydonda hali to‘liq harakat qila olmaydi. Bu yangi sxemadagi muhim holat Paulo Dibala uchun foydali bo‘lmoqda. Unga endi ko‘proq erkinlik berilmoqda. Hujumda Dibala o‘zi istagan yo‘nalishda harakat qilmoqda. Argentinalik futbolchining istiqbolini chamalaydigan bo‘lsak, yaqin kelajakda dunyo futbolining yangi yulduzi bo‘lishi ehtimoli juda yuqori. Ko‘rinib turibdiki, «Yuventus»ning yangi taktik sxemasi Paulo Dibalaning imkoniyatlarini oshirishda haqiqiy yechim bo‘la oladi.
Marchello Lippi La Gazzetta dello Sport da Allegrining tanloviga yuqori baho berib o‘tdi. “Allegri boshqa murabbiylarga o‘xshamaydi. Ba’zilar jamoada o‘yin uslubini, uning shakllanishini zudlik bilan amalga oshirish kerak degan fikrda. Bu esa aksincha jamoani kuchsizlantiradi. Allegri esa boshidan 3-5-2 o‘yin sxemasidan voz kechmadi. 4-2-3-1 sxemasidan esa qulay paytda foydalana boshladi”.
