Qibraydagi o‘quv-mashg‘ulot bazasi maydonida “Navbahor” va “Surxon” jamoalari o‘rtasidagi nazorat o‘yini o‘tkazildi.
Unda namanganliklar 3:0 hisobida g‘alaba qozonishdi. Birinchi bo‘lim o‘rtalarida Mirzoxid G‘ofurov hisobni ochdi. Termizliklarda tez orada hisobni tenglashtirish imkoniyati yuzaga kelgandi. Lekin, “Surxon” futbolchisi penaltini aniq amalga oshira olmadi. Tanaffusga oz vaqt qolganida Nemanya Yovanovich hakam tomonidan qizil kartochkaga loyiq deb topildi. Nazorat o‘yini bo‘lganligi sababli serbiyalik hujumchi o‘rnini Abduaziz Sultanov egalladi. Birinchi bo‘limda G‘ofurovning goli yagonaligicha qoldi.
Ikkinchi bo‘limda futbolchilarimiz raqib darvozasini ikkinchi bor nishonga olishdi. Mirzohid G‘ofurov raqib posboni bilan yakkama-yakka vaziyatga chiqib borayotgan bir pallada chalib yiqitildi. Natijada “Surxon” darvozasiga penalti belgilandi. 11 metrlik jarima zarbasini Oybek Qilichev aniq amalga oshirdi. Oradan biroz vaqt o‘tib Qilichev Timur Tolipovni gol urishiga sharoit yaratib berdi. Tolipov esa yakuniy zarbani berishda xatolikka yo‘l qo‘ymadi – 3:0.
Uchrashuvda «Navbahor» tarkibi quyidagicha bo‘ldi: Asilbek Amanov, Darko Stanoyevich, G‘iyos Komilov, Alisher Samatov, Tohir Shamshitdinov, A’zam Aliyev, Alisher Mirzayev, Oybek Qilichev, Mirzohid G‘ofurov, Timir Tolipov, Nemanya Yovanovich. Zaxiradan maydonga tushganlar: Akmal Ortiqov, Abduaziz Sultanov, Jahongir Mehmonov, Abbos Otaxonov, Ilhom Aliboyev, Hasanboy Ergashev.
Shu tariqa «Navbahor»ning Toshkentda o‘tkazilgan mashg‘ulotlari yakuniga yetdi. Endi jamoa a’zolari ikki kunlik dam olishdan keyin, 28 fevral kuni Namanganda to‘planib, tayyorgarlikning yakuniy bosqichini boshlaydi. “Navbahor” chempionatning dastlabki turida 4 mart kuni Toshkentning “Obod” klubini qabul qiladi.
