La Liga 24-turidan o‘rin olgan «Atletiko»ga qarshi o‘yinda muxlislar boshqacha «Barselona»ni ko‘rishga muvaffaq bo‘ldi. «Ko‘k-anorranglilar» Madridda 3-4-3 sxemasi bo‘yicha harakatlandi, Luis Enrikening so‘zlariga qaraganda esa to‘psiz harakat vaqtida bu 4-4-2 ga o‘zgarib turgan.

Nima bo‘lganda ham, buni juda samarali deb bo‘lmaydi. «Barselona»ni 4-3-3 taktik sxemasi bo‘yicha o‘ynatishga odatlangan Luis Enrike «PSJ»dan 4:0 hisobida mag‘lub bo‘lingan o‘yinnning ikkinchi bo‘limida 4-2-3-1 ga o‘tishga urinib ko‘rdi, «Leganes»ga qarshi 2:1 hisobida g‘alaba qozonligan o‘yinda esa yana birinchi bo‘limda 4-3-3, ikkinchi bo‘limda 4-2-3-1 sxemasi kuzatildi.

Biroq «Leganes» o‘yin oxirida belgilangan penalti evaziga mag‘lub etilgan, «Atletiko»ga qarshi «Visente Kalderon» stadionida kechgan eng so‘nggi o‘yinida ancha qiynalgan bo‘lsa ham, «Barselona» o‘yinida biroz bo‘lsa-da yaxshi tomonga o‘zgarish sezildi.

Endilikda yarim himoyada uch, to‘rt va besh nafargacha futbolchidan foydalanayotgan ushbu «Barselona» avvalgiday uchrashuvning boshidan oxirigacha o‘yinni nazorat qiladigan jamoa emas. Klubni Xavi tark etgach va Luis Suares kelgach, «Barsa» keskin hujumlarga asoslangan uslubga o‘tdi va o‘zining fantastik hujum chizig‘iga juda bog‘lanib qoldi.

«Barselona» uchun yaxshi jihat esa Lionel Messi ushbu jamoada to‘p surayotganidir. Argnetinalik hujumchi «Leganes» darvozasiga ikkala golni ham urdi va «Atletiko» bilan o‘yinda g‘alaba to‘pini kiritdi. Bungacha ham Messi «Valensiya»ga qarshi o‘yinda g‘alaba to‘pini kiritgan, «Sevilya»ga qarshi o‘yinda hisobni tenglashtirib g‘alabaga hissa qo‘shgan, «Real Sosedad» va «Vilyarreal»ga qarshi o‘yinlarda jamoasiga 1 ochko taqdim etgan edi.

Shunday ekan, jamoasi qanday tizimda o‘ynashi, yarim himoyaning yaxshi o‘yin ko‘rsata olishi yoki olmasligidan qat’i nazar, besh karra «Oltin to‘p» sohibi har doim yordamga shay bo‘lib qolmoqda.