Yana sanoqli kunlardan so‘ng barcha futbol ixlosmandlari O‘zbekiston Oliy ligasi o‘yinlarini kuzatib borishi mumkin bo‘ladi.

Barcha jamoalar singari "Navbahor" jamoasi ham o‘z tarkibini kuchaytirishga erishdi. Transfer bozorida "Navbahor" hamda "Buxoro" jamoalari ancha faol bo‘lishdi.

"Navbahor" jamoasi o‘z safiga o‘ndan ziyod futbolchini qo‘shib oldi - o‘z navbatida klubni shunga yaqin o‘yinchilar tark etdi.

Darvoza chizig‘i nisbatan kuchaytirildi. Akmal Ortiqov to‘laqonli klub a’zosiga aylangan bo‘lsa, unga raqobatchi sifatida Asilbek Amanov jamoaga taklif etildi.

Himoya chizig‘i ham ancha kuchaytirilgani bor gap. "Neftchi" jamoasidan sobiq "navbahorchilar" ortga qaytdi. Jahongir Mehmonov hamda Alisher Samatov yana Namanganda to‘p surishadi.

Shuningdek, himoya qo‘rg‘oniga namanganlik G‘iyos Komilov va yana bir sobiq "lochinlar" vakili Hasanboy Ergashevlar ham qo‘shilishgan. Serbiyalik Darko Stanoyevich bilan esa himoya chizig‘i yanada kuchaytirildi.

Yarim himoya - "Navbahor"ning eng kuchli chizig‘iga aylandi deyish mumkin. "Paxtakor"dan Ravshan Xursanov, Alisher Mirzayev, Abbos Otaxonov va Timur Tolipov jamoaga qo‘shilishgan.

Bundan tashqari, "Neftchi"dan Mansur Saidov hamda so‘nggi vaqtda xorijda to‘p surgan Oybek Qilichev ham "Navbahor"da to‘p surishadi.

Mirzohid G‘ofurov hamda Abdulaziz Sultonov yana "Navbahor"ga qaytishdi.

Hujum chizig‘idan esa bolqonlik Nemanya Yovanovich hamda Ro‘zimboy Ahmedov joy egallashdi.

O‘tgan yilgi tarkibdan jamoani Artur Parvanov, Aleksandr Korneychuk, Murod To‘ychiboyev, Aziz Mamazoitov, Akram Bahriddinov, Qahramon Muhammadjonov, Alisher Mahmudov, Islom Isoqjonov, Vladislav Nuriyev, Vladislav Aleksin va Abdumalik Abdullayev tark etishdi.