Rossiyaning SSKA klubi hujumchisi Aaron Olanare yoshligidan armiyachilarga muxlislik qilishini aytdi
"Nigeriyada yashagan chog‘imda "armiyachilar"ning o‘yini kuzatardim. Xitoyda o‘ynayotganimda agentim kelib, SSKA va boshqa klublardan tushgan takliflar bitilgan qog‘ozlarni oldimga tashladi. Men boshqa takliflarni uloqtirib tashladim va ular haqida eshitishniyam istamasligimni aytdim. Men uchun faqat SSKA mavjud edi, chunki bu klubni chin yurakdan sevar edim.
Nega? Chidi Odia tufayli. Nigeriya - katta mamlakat, ammo ishonmassiz, Chidi bilan juda yaqin yashaganmiz. River shtatida, Port-Xarkort shahrida yashaganmiz. Bir jamoa uchun o‘ynaganmiz, ammo turli yillarda. Yoshligimizda, kunlardan birida futbol maktabimizga Chidi keldi. U biz uchun katta o‘yinchi, yulduz edi. Biz unga buyuk futbolchi kabi qarardik. U bizga SSKA haqida so‘zlab bergandi.
Shuning uchun hazillashmayapman, yoshligimdan SSKA muxlisiman", - deydi Olanare.
Eslatib o‘tamiz, Chidi Odia 2004 dan 2012 yilgacha SSKAda to‘p surgan.
