Россиянинг ЦСКА клуби ҳужумчиси Аарон Оланаре ёшлигидан армиячиларга мухлислик қилишини айтди

"Нигерияда яшаган чоғимда "армиячилар"нинг ўйини кузатардим. Хитойда ўйнаётганимда агентим келиб, ЦСКА ва бошқа клублардан тушган таклифлар битилган қоғозларни олдимга ташлади. Мен бошқа таклифларни улоқтириб ташладим ва улар ҳақида эшитишниям истамаслигимни айтдим. Мен учун фақат ЦСКА мавжуд эди, чунки бу клубни чин юракдан севар эдим.

Нега? Чиди Одиа туфайли. Нигерия - катта мамлакат, аммо ишонмассиз, Чиди билан жуда яқин яшаганмиз. Ривер штатида, Порт-Харкорт шаҳрида яшаганмиз. Бир жамоа учун ўйнаганмиз, аммо турли йилларда. Ёшлигимизда, кунлардан бирида футбол мактабимизга Чиди келди. У биз учун катта ўйинчи, юлдуз эди. Биз унга буюк футболчи каби қарардик. У бизга ЦСКА ҳақида сўзлаб берганди.

Шунинг учун ҳазиллашмаяпман, ёшлигимдан ЦСКА мухлисиман", - дейди Оланаре.

Эслатиб ўтамиз, Чиди Одиа 2004 дан 2012 йилгача ЦСКАда тўп сурган.