“Navbahor” va “Obod” jamoalari o‘rtasidagi uchrashuv yakuniga yetgach o‘tkazilgan matbuot anjumanining birinchi qismida “Obod” klubi direktori Farhod Safarov jurnalistlarning savollariga javob qaytardi:

- Avvalambor “Navbahor” jamoasini bugungi g‘alaba bilan tabriklayman. Qolaversa, Namangan xalqini kirib kelayotgan Navro‘z ayyomi hamda kecha boshlangan yangi chempionat bilan ham muborakbod etaman. O‘yin borasida to‘xtaladigan bo‘lsak, bahsni qay tarzda kechganligiga o‘zinglar guvoh bo‘ldinglar. Uchrashuv boshida tezkor gol o‘tkazib yubordik. Chempionat startida o‘ynash doimo og‘ir bo‘ladi. Dastlabki turlarda maydonda to‘p surishni o‘zi bo‘lmaydi. Jamoa uchta yoki to‘rtta o‘yin o‘tkazgach barchasi izga tushib ketadi. Albatta bosh murabbiyni yo‘qligi ta’sir ko‘rsatadi. Barchaga ma’lumki, Rauf Inileev jarrohlik amaliyotini boshidan o‘tkazdi. Ayni paytda tiklanish muolajalari olib borilmoqda. Aynan shu sababli bosh murabbiy bugun biz bilan birga bo‘la olmadi. Uning yo‘qligi o‘z ta’sirini ko‘rsatdi. Agarda Inileev jamoa bilan birga bo‘lganida barchasi boshqacha tarzda tus olardi. Nazarimda maydon bizning futbolchilar uchun og‘ir bo‘ldi. Jamoamiz safidan joy olgan o‘yinchilarni qay tarzda harakat qilishlari va yugurishlarini yaxshi bilamiz. Maydonni bosimi o‘z ta’sirini qildi deb o‘ylayman. Mavsum boshida hamma joyda ham maydonlarni holati shunday bo‘ladi. Yetakchi futbolchilarimizdan biri Shohruz Norxonovning jarohati og‘ir emas. Shu sababli keyingi turda maydonga tushadi deb ayta olaman.