“Навбаҳор” ва “Обод” жамоалари ўртасидаги учрашув якунига етгач ўтказилган матбуот анжуманининг биринчи қисмида “Обод” клуби директори Фарҳод Сафаров журналистларнинг саволларига жавоб қайтарди:

- Авваламбор “Навбаҳор” жамоасини бугунги ғалаба билан табриклайман. Қолаверса, Наманган халқини кириб келаётган Наврўз айёми ҳамда кеча бошланган янги чемпионат билан ҳам муборакбод этаман. Ўйин борасида тўхталадиган бўлсак, баҳсни қай тарзда кечганлигига ўзинглар гувоҳ бўлдинглар. Учрашув бошида тезкор гол ўтказиб юбордик. Чемпионат стартида ўйнаш доимо оғир бўлади. Дастлабки турларда майдонда тўп суришни ўзи бўлмайди. Жамоа учта ёки тўртта ўйин ўтказгач барчаси изга тушиб кетади. Албатта бош мураббийни йўқлиги таъсир кўрсатади. Барчага маълумки, Рауф Инилеев жарроҳлик амалиётини бошидан ўтказди. Айни пайтда тикланиш муолажалари олиб борилмоқда. Айнан шу сабабли бош мураббий бугун биз билан бирга бўла олмади. Унинг йўқлиги ўз таъсирини кўрсатди. Агарда Инилеев жамоа билан бирга бўлганида барчаси бошқача тарзда тус оларди. Назаримда майдон бизнинг футболчилар учун оғир бўлди. Жамоамиз сафидан жой олган ўйинчиларни қай тарзда ҳаракат қилишлари ва югуришларини яхши биламиз. Майдонни босими ўз таъсирини қилди деб ўйлайман. Мавсум бошида ҳамма жойда ҳам майдонларни ҳолати шундай бўлади. Етакчи футболчиларимиздан бири Шоҳруз Норхоновнинг жароҳати оғир эмас. Шу сабабли кейинги турда майдонга тушади деб айта оламан.