"Barselona" hujumchisi Lionel Messi "Selta" darvozasiga birinchi golni urganidan keyin golni noodatiy tarzda nishonladi. U muxlislar o‘tirgan tribuna tomonga yuzlangancha, qo‘lini qulog‘iga telefon shaklida tutdi va kimgadir qo‘ng‘iroq qilishini ta’kidlagandek bo‘ldi.

Bu vaqtda Lionel "Kasp Nou" stadioni vip-lojasi tomon qaragani uchun, futbolchi klub rahbariyatiga yangi shartnoma borasida o‘zining otasiga qo‘ng‘iroq qilish kerakligini aytdi, degan fikrlar paydo bo‘ldi. Ammo aslida argentinalik futbolchining xatti-harakatlari ostida boshqa ma’no yotgani aniq bo‘ldi.

AS nashri tarqatgan xabarga ko‘ra, Lionel bunday imo-ishora orqali o‘z jiyaniga murojaat qilgan. Jiyan o‘yin kuni Messiga bir necha marta qo‘ng‘iroq qilgan, ammo bahsga tayyorgarlik ko‘rayotgan Leo uning qo‘ng‘iroqlariga javob bera olmagan. Messi esa gol urganidan keyin jiyanidan yana qo‘ng‘iroq qilishni so‘ragan.