«Park de Prens»dagi yirik g‘alabadan keyin «PSJ» «Barselona«ga qarshi javob uchrashuviga qulay vaziyatda kirib kelmoqda. Unda parijliklar oldida yanada muhim vazifa - dastlabki uchrashuvdagi g‘alaba tasodif emasligi, «PSJ»ning haqiqiy saviyasi ekanligini isbotlash turibdi.

Kataloniyaliklarga qarshi javob bahsida Unay Emeri qo‘l ostidagi deyarli barcha shogirdlariga suyanishi mumkin. Jamoaning yangi a’zosi Gonsalo Guedes «Benfika» bilan ushbu mavsumda Chempionlar Ligasi bahsida qatnashgani sababli «PSJ»ga yordam bera olmaydi. «Barselona» javob uchrashuviga qadar yangi taktikasini shakllantirgan bo‘lsa, Unay Emeri 4-3-3 taktikasiga sodiq qolishi aniq. Shu bois, parijliklar asosiy tarkibi quyidagicha ko‘rinish olishi ehtimoli yuqori: darvozani qo‘riqlash Trappga ishonib topshiriladi. Himoyani markazini Markinyos – Silva juftligi himoya qiladi. Dastlabki uchrashuvda qahramonlardan biri bo‘lgan Presnel Kimpembe o‘rniga jamoa sardori o‘z joyini qayta egallashi kutilmoqda. O‘ng qanotda ilk bahsda Kavaniga golli uzatmani amalga oshirgan Tomas Menye egallaydi. Leyvin Kurzava esa mos ravishda chap qanotdan joy oladi.

Tiago Mottaning diskvalifikasiyasi Unay Emerining yarim himoyadagi imkoniyatlarini tushirib yubordi. Ispaniyalik murabbiy tayanch yarim himoyachisi vazifasini yana bir bor Adriyen Rabyoga ishonib topshirsa kerak. Bu amplua fransiyalik yarim himoyachining sevimli vazifasi emas, biroq so‘nggi bahslarda yangi vazifasida ham ishonchni oqlab kelmoqda. Unga yarim himoyada Blez Matyuidi va Marko Verratti yordam beradi. Aynan shu uchlik dastlabki uchrashuvda ham o‘yin taqdirini hal qilgan edi.

Hujumda Di Mariya – Kavani – Draksler uchligi harakat qilishi kerak. Garchi Lukas Moura ispaniyalik murabbiy tomonidan eng ko‘p qo‘llanilayotgan futbolchi bo‘lsada, aynan argentinalik futbolchining sa’y-harakatlari evaziga «PSJ» dastlabki uchrashuvni o‘z foydalariga hal qilgan edi. Umuman, bu hujum uchligining barchasi «Park de Prens»da o‘z nomlariga gol yozdirib qo‘ya olgan.