Oliy liganing 2-turi doirasida "Lokomotiv" va "So‘g‘diyona" jamoalari o‘rtasidagi o‘yindan keyingi matbuot anjumanining ikkinchi qismida jizzaxliklar bosh murabbiy Davron Fayziyev ishtirok etdi.

"Bugun "Lokomotiv" futbolchilari oson g‘alabani qo‘lga kiritishni maqsad qilib chiqqani ko‘rindi. Ammo biz raqibga jiddiy qarshilik ko‘rsatdik. Penaltidan o‘tkazib yuborilgan gol o‘yinchilarni ruhan "sindirdi". O‘ylashimcha, bugungi o‘yinda yirik hisobda mag‘lubiyatga munosib emasdik. Ammo bu futbol. Mavsumni vise-chempion va chempion bilan safarda boshlash biz uchun og‘ir. Endi bu o‘yinlarni unutib, yigitlarni keyingi o‘yinlarga ruhan tayyorlashimiz kerak.

Penalti borasida nima deyishim mumkin? Hakam hushtak chaldimi, demak, u haq. Hakam hech qachon qarorini o‘zgartirmaydi. Boshqa tomondan hakamlar bo‘lar-bo‘lmasga o‘yinni to‘xtataverishi kerak emas. Ular ham o‘yinning qiziqarli kechishiga yordam berib, yakkakurashlarga yo‘l qo‘yib berishi lozim. Penalti qanchalik asosli bo‘lganini bilish uchun takroriy videolavhani ko‘rish kerak. Men turgan joydan esa raqib futbolchisi hali kontakt bo‘lmasdan oldin yiqilishni boshlagandek ko‘rindi.

Ushbu mavsumda "So‘g‘diyona"dan nima kutish mumkin? Oldimizga qo‘yilgan vazifa shundan iboratki, o‘tgan yili egallagan o‘rnimizdan yuqoriroq pog‘onani egallashimiz shart. O‘tgan mavsumda 10-o‘rinni band etgandik. Har yili yangi futbolchilarni yig‘ib, yangi jamoani shakllantirish murabbiy uchun oson emas. Bugunga bahsda o‘tgan yilgi tarkibdan atigi 3 nafar futbolchi o‘ynadi. Keyingi turlarda "Olmaliq" va "Nasaf"ga qarshi o‘ynashimizni inobatga olsak, taqvim biz uchun oson emas. Jamoaviy o‘yinni yo‘lga qo‘yib olishimiz uchun bizga biroz vaqt kerak. O‘yinni yo‘lga qo‘yib olsak, har qanday jamoa bilan o‘ynasa bo‘ladi. Meni bugun xursand qilgan narsa — futbolchilar o‘yindan oldin ruhan taslim bo‘lishmagandi. Qolganini to‘g‘rilasa bo‘ladi", - dedi Davron Fayziyev.