"Barselona" va PSJ o‘rtasidagi o‘yin hind kinolarining oxirlaridagi yaxshi va yomon qahramonning qasos sahnasiga o‘xshab ketadi. Birinchidan, arzon sahna.

Yovuz qahramondan qasos olgani kelgan yaxshi qahramon doim g‘olib chiqadi. Kinoning qoidasi shunaqa. "Barselona"ning hayoti o‘z qo‘lida emas edi. PSJ o‘yinga xuddi o‘sha filmlardagidek baquvvat va kuchli keldi. "Barselona" esa, yarador edi. Birgina harakat va yaxshilik yovuzlik ustidan g‘alaba qozonmay, hindlarnikiga o‘xshagan ssenariy ostin-ustun bo‘lib ketardi. Lekin, o‘sha harakat juda kech berildi. 4:0 hisobidagi ustunlikni berib yuborish faqat hind filmlaridagina bo‘ladi. "Barselona"ning bu kambeki ijobiylikka to‘la. Undan o‘rnak oladigan tomonlari juda ko‘p. Bugun ertalab, mahallalarda PSJ’ning yangi ishqibozlari paydo bo‘lishi mumkin edi. Lekin, Parij klubi bundan buyog‘iga qo‘rqoqlik timsoli sifatida gavdalansa kerak.

Meni hayron qoldirgan narsa - hisob 3:1 ekanligida, "Barselona"ning nima maqsadda 4-golni urganligi bo‘ldi. Bu - xuddi 4 ta non uchun 10 kishi navbatda turgandek va 10 kishi nima maqsadda turganligini tushuna olmaganim kabi edi. Bu - umid edi! Tarixda 185 marta 4:0 bo‘lgan, lekin hech kim bu hisobni sindira olmagan. Umid esa doimo sindirishga qodir. Ertami, kechmi, mana 186-urinishda "Barselona" 4:0 ni sindira oldi.

Sanjar RIZAYEV,

O‘FF matbuot kotibi, "O‘zReportTV" sharhlovchisi.