Men odatda, o‘zim muxlislik qiladigan biror jamoaga ko‘proq gol kerak bo‘lib turganda, qolgan vaqtni qismlarga bo‘lib olib, tomosha qilaman. Masalan, 60-daqiqagacha bitta ursa, keyin 75-daqiqagacha yana bitta ursa... va hokazo. Mana shunday holatda o‘zimga va jamoamga reja qo‘yib, tomosha qilishim osonroqdek tuyuladi.
"Barselona" futbolchilari 90 daqiqada PSJ darvozasiga 4 gol urishlariga ishonishlari qiyin kechgandir, ishonaman. Ammo 20 daqiqada bir gol urishga ishonsa bo‘ladi. So‘nggi o‘n daqiqada uchta gol urish imkonsizdir, ammo uch daqiqada 1 gol urishga urinib ko‘rsa bo‘ladi, farqini sezyapsizmi?
Futbol, futbol deyiladi, ammo bunday o‘yinlar bizga hayotni anglatadi. Yashashni o‘rgatadi. Oldingizdagi maqsad qanchalik mashaqqatli va uzoq bo‘lishidan qat’i nazar, agar to‘g‘ri yondoshilsa, bugungi vazifalar bosqichma-bosqich to‘g‘ri amalga oshirilsa, oxirida albatta mukofot borligini isbotlaydi. Kechagi o‘yin faqat "Barselona" yoki futbol muxlislari uchun emas edi.
Qahramon ASLANOV,
jurnalist
