Kechagi o‘yin haqidami? Xo‘p, lekin ikki voqeani eslagan holda. Ikkisi ham PSJga ataladi.

Avvalo sababga to‘xtalay. PSJ bu o‘yinga yutqazmaslik uchun emas, to‘rttadan kamroq gol o‘tkazish uchun kelgani oldindan ma’lum bo‘lib qoldi, mana shuning o‘zi eng katta xato edi. Bu holatga tushishlariga ularning aslida qanday jamoa ekanliklari sabab bo‘ldi, menimcha.

Esingizda bo‘lsa, 1998 yilgi JCHda quturgan Nigeriya pley-offga chiqishi bilanoq Daniyadan o‘yin boshidayoq ikkita gol o‘tkazib yuborgandi. Shunda sharhlovchi Gusev zo‘r gap aytgandi: "Aslida, Nigeriya termasi yulduzlardan tashkil topgan, juda kuchli jamoa. Ular Fransiyaga kelib, hali yulduzligi arimay turib guruhda zo‘r o‘ynay olishdi. Lekin bugungi bahsgacha ular bir-birlari bilan ko‘p yashab yuborishgani sabab yulduzlar jamoasi darajasidan tushib, AFRIKALIKLARga aylanib qolishdi. Ular o‘z qabilalariga qaytishdi".

PSJ uch hafta ichida ana shu qabilaga aylandi. Ularning yulduzligidan, birinchi o‘yindagi o‘yinidan asar qolmaganiga sabab shu va tabiiyki, hali katta murabbiy bo‘la olmagan, qo‘rqoq Emeri...

2004 yili mashina minishni endi o‘rganib, TVdan bir o‘zim yo‘lga chiqayotganimda ichimdan o‘tgan bir holat ham hech esimdan chiqmaydi. Mashinani uydan birga haydab kelgan jiyanim hayallab qolganidan tavakkaliga o‘zim haydamoqchi bo‘ldim. Lekin o‘sha lahzadayoq qo‘rquv ichida qolyapman. Mashinaga o‘tiryapmanu, lekin haydamasligim kerakligini bilib turibman. Kalitni burayapmanu, ich-ichimdan, yurmasaydi, deyapman. Yuryapti mashina va... hodisa!

Kechagi oltinchi golda o‘sha holat yana takrorlangandek bo‘ldi. Ya’nikim, taqdiri ilohiy o‘z hukmini o‘tkazayotgan paytda bandasi qarshilik qilmoqchi bo‘lsa-da o‘sha hukm izmida bo‘ladi. Bu endi voqealar sababi ustida ishlamagan PSJga munosib jazo edi. Muqarrar jazo edi.

"Barselona" haqida ko‘p yozmayman. Bu haqda o‘sha birinchi o‘yindan keyinoq bor ta’rifu tavsifni berib bo‘lganman. Buyuk jamoalarning xatosi-da buyuk bo‘ladi, o‘sha xatoni to‘g‘rilash jarayonlari-da buyuk bo‘ladi. Ular bu ishni shu mezonda bajarishga majburlar. Aks holda, ular buyuk bo‘la olmasdilar. Men "Barsa"ga uch hafta oldin shunday xato qilgani uchun rahmat demoqchiman. Aks holda kechagi trillerni ko‘rmasdik.

PSJga qaytaman: O‘sha avariyadan keyin men mashina haydamay qo‘yganman. Qo‘rqib qolgandim... Tushundingiz, xullas?!

Xayrulla Hamidov,
Jurnalist.