Oliy Liga 2-tur doirasidagi «Dinamo» - «Sho‘rtan» (3:0) uchrashuvidan keyin, gol muallifi bo‘lgan Samarqand jamoasi hujumchisi Abdumalik Abdullayev jurnalistlar savollariga javob qaytardi.
- Muhim o‘yinda ajoyib g‘alabaga erishganimizdan juda xursandmiz. Bizni qo‘llab-quvvatlayotgan barcha muxlislarimiz va klub rahbariyatiga ham rahmat. Bugun minglab ishqibozlarimiz ko‘z o‘ngida g‘alaba qozonmasak bo‘lmasdi. «Metallurg» bilan o‘yindan keyin «Sho‘rtan» bilan bahsga ham yaxshi tayyorgarlik ko‘rishga intildik. Murabbiylar shtabi jamoani yaxshi tayyorlay oldi.
- «Dinamo»ning kutilmagan omadli startining sabablari nimada deb o‘ylaysiz?
- To‘g‘ri jamoamiz tarkibi yig‘ilganiga hali ko‘p bo‘lmadi. Lekin «Dinamo»da juda ahil jamoa yig‘ilgan. Barcha bir-birini qo‘llab-quvvatlashga intilayapti. Barchamiz muxlislarimizni xursand etish uchun katta ishtiyoqda harakat qilayapmiz. Murabbiylar bizga ishonayotgan ekan, shunga yarasha javob berishga intilayapmiz.
- «Metallurg»ga qarshi bahsda zaxiradan maydonga tushib, ikkinchi gol kiritilishiga sababchi bo‘lgan edingiz. Bugun ham zaxiradan maydonga tushib, 3-golni kiritdingiz. Bu murabbiylar ko‘rsatmasimi?
- Xuddi shunday, o‘yindan oldin Ilhom aka Sharipov ikkinchi bo‘limda maydonga tushib, hujumkorlikni oshirishim lozimligini aytgandilar. Jarima to‘pi uzatilgach, vaziyatdan foydalanib gol urdim. Oldinda bizni yana qiyin o‘yinlar kutib turibdi. Muxlislar mana shunday qo‘llab-quvvatlab turishsa, keyingi turda «Paxtakor»ga qarshi bahsda ham kamida durang natija uchun harakat qilamiz.
