FIFA bosh kotibi Fotima Samura Sankt-Peterburgda o‘tkazilgan matbuot anjumanida JCH-2018ni Rossiyadan olib qo‘yish uchun asos yo‘qligini ta’kidlab o‘tdi.

"Jahon chempionati mezbonligi uchun tanlov adolatli o‘tgan. Mezbonlikni Rossiyadan olib qo‘yish uchun hech qanday asos yo‘q. Rossiyaliklar tarixdagi eng yaxshi JCH va Konfederasiyalar kubogini o‘tkazishmoqchi. FIFA ham turli xil boykotlarni oldini olish uchun barcha choralarni ko‘rdi".

Shuningdek, Samuraning ta’kidlashicha, Yevro-2016da bo‘lganidek janjallar yuzaga kelmasligi uchun FIFA kerakli choralarni ko‘rmoqda.

"Doping, janjal-to‘polonlar — bu xalqaro muammo. Shuning uchun Fransiyadagidek tartibsizliklar yuzaga kelmasligi uchun hukumat bilan birgalikda ishlayapmiz. Janjalkash sifatida tanilgan insonlar stadionga qo‘yilmaydi", – dedi FIFA bosh kotibi.