«PSJ» rahbariyati «Barselona»ga (1:6) qarshi o‘yinni boshqargan hakam Deniz Aytekinning ustidan UYEFAga rasmiy norozilik shikoyatini yubordi.

Hujjatda hakamning o‘yin natijasiga ta’sir qilgan quyidagi qo‘pol xatolari sanab o‘tilgan:

1. Birinchi bo‘limda Xavyer Maskerano o‘z jarima maydoni ichida Yulian Drakslerning uzatmasini qaytaraman deb to‘pga qo‘li bilan o‘ynagan.

2. 41-daqiqada Jerar Pike Edinson Kavaniga qarshi qilgan qo‘polligi uchun ikkinchi sariq kartochka bilan jazolanmagan.

3. Ikkinchi bo‘lim boshida, Neymar yerga yiqilgan himoyachi Tomas Menyega atayin urilgan. Bu vaziyatda penalti noto‘g‘ri belgilangan. Dastlab bosh hakam penalti belgilamagan, keyinchalik darvoza ortida turuvchi hakamning gapi bilan 11 metrlik nuqtani ko‘rsatgan.

4. Hisob 3:1 bo‘lib turganida Neymar Markinyosning oyog‘iga atayin tepgan va qizil kartochka bilan jazolanmagan.

5. 78-daqiqada Anxel di Mariya tomonidan oshirilgan to‘p jarima maydoni ichida himoyachi Jerar Pikening qo‘liga tekkan va hakam penalti belgilamagan.

6. Maskerano jarima maydoni ichida Anxel di Mariyaga nisbatan qoida buzgan. Bosh hakam uni maydondan chetlatmagan va penalti belgilamagan.

7. Hisob 4:1 bo‘lib turganida Luis Suares jarima maydoni ichida simulyasiya qilib yiqilgan. Bosh hakam unga ikkinchi sariq kartochkani ko‘rsatish o‘rniga, PSJ darvozasiga penalti belgilagan.

Hujjatni tuzish jarayonida Fransiya klubi xalqaro toifadagi hakamlar bilan maslahatlashgan.