“Navbahor” va “Neftchi” jamoalari o‘rtasidagi uchrashuv yakuniga yetgach, matbuot anjumani bo‘lib o‘tdi.

Dastlab jurnalistlarning savollariga “Neftchi” ustozi Andrey Fyodorov javob qaytardi:

"Bugungi bahs “derbi” maqomiga to‘la mos keldi deb aytishim mumkin. O‘yinni muxlislarga manzur bo‘lganligi ayni haqiqat. Ammo, murabbiylar borasida bunday deb bo‘lmaydi. Keskin kurash kechganligi sababli bosim kuchli bo‘ldi. “Navbahor”ga qarshi uchrashuvga jiddiy tarzda tayyorgarlik ko‘rgandik. Ikki raqibning o‘zaro o‘yinlari doimo murosasiz va keskin ruhda o‘tib kelgan. Futbolchilarimizni maydonda ko‘rsatgan matonatlaridan qoniqish hosil qildim. Balki o‘ylagan o‘yinimizni ko‘rsata olmaganimiz sababli qayerdadir o‘xshamagan bo‘lishi mumkin. Lekin, bugun maydon egalari bizga o‘zlarining havodan to‘p oshirishlari bilan ko‘p tashvish olib kelishdi. Har holda ularning bo‘ydor hujumchilari borligi sababli va Yovanovichni ikkinchi qavatda yaxshi o‘ynash olishi sababli qayerdadir vazifani uddalay olmagandirmiz. Masalan penalti belgilangan vaziyatda ham shunday holat kuzatildi. Uchrashuvni qayta ko‘rib chiqib, qayerda xatoga yo‘l qo‘yganimizni o‘rganib chiqamiz. “Derbi”ga xos o‘yin bo‘lganligi ko‘pchilikka manzur bo‘ldi deb o‘ylayman. Shu sababli har ikki jamoa tomonidan yo‘l qo‘yilgan xato va kamchiliklar ko‘zga ko‘rinmagan bo‘lishi mumkin. Futbolchilik davrida ham “derbi”da ko‘p bor maydonga tushganman. O‘sha paytlardan beri ikki raqib qarama-qarshiligi shiddatli va murosasiz ruhda o‘tib kelgan. Bahsni shunday tarzda kechishi oldindan kutilgandi. Bugungi o‘yindan emas, aksincha futbolchilarimizni bor imkoniyatlarini ishga solganliklaridan qoniqish hosil qildim. O‘zimiz o‘ylagan darajada to‘p surishimizga “Navbahor” ham imkon bermadi. Natija esa bizni qoniqtirdi. Maydonda ko‘rsatgan o‘yinimizdan kelib chiqib fikr yuritadigan bo‘lsa bugun biz ikki ochko yo‘qotdik. Namanganga g‘alaba ilinjida kelgandim. Ammo, yakunda duranga erishdik" - dedi Fyodorov.