“Manchester Yunayted”ning afsonaviy murabbiyi Aleks Fergyuson Krishtianu Ronaldu va Lionel Messining davri tugagach, Ispaniya klublarining yevrokuboklardagi natijalari ham pasayishini aytib o‘tdi. Uning fikriga ko‘ra avvalgi yillarda bo‘lgani singari ingliz klublari yevrokuboklarda yana muvaffaqiyat qozonadilar.
“Nima uchun ingliz klublari Chempionlar ligasini yutolmaydi ? Chunki bu og‘ir, juda juda og‘ir ish. 70-yillarda “Ayaks” va “Bavariya”, 80-yillarda “Liverpul”, 90-yillarda Italiya klublari, “Milan”. So‘ngra Angliya jamoalari. Biz 4 yil ichida 3 marta finalda ishtirok etganmiz.
Hozirda esa hukmronlik Ispaniya klublari tomonida bo‘lib turibdi. Xuddi shu savolni “Bavariya”ga ham berib ko‘rsangiz bo‘ladi. Nima uchun mazkur jamoa ham, Italiya va Fransiya jamoalari ham Chempionlar ligasida g‘alaba qozona olmayapti? Chunki ayni damda Ispaniya klublarining davri. Lekin hammasi o‘zgarib ketishi mumkin. Ronalduning ham, Messining ham yoshi o‘tib bormoqda. Ularning o‘rnini kimdir bosa oladimi? Ular o‘z faoliyatini yakunlagach, bu davr ham tugaydi”, - dedi Fergyuson.
