“Манчестер Юнайтед”нинг афсонавий мураббийи Алекс Фергюсон Криштиану Роналду ва Лионел Мессининг даври тугагач, Испания клубларининг еврокубоклардаги натижалари ҳам пасайишини айтиб ўтди. Унинг фикрига кўра аввалги йилларда бўлгани сингари инглиз клублари еврокубокларда яна муваффақият қозонадилар.

“Нима учун инглиз клублари Чемпионлар лигасини ютолмайди ? Чунки бу оғир, жуда жуда оғир иш. 70-йилларда “Аякс” ва “Бавария”, 80-йилларда “Ливерпул”, 90-йилларда Италия клублари, “Милан”. Сўнгра Англия жамоалари. Биз 4 йил ичида 3 марта финалда иштирок этганмиз.

Ҳозирда эса ҳукмронлик Испания клублари томонида бўлиб турибди. Худди шу саволни “Бавария”га ҳам бериб кўрсангиз бўлади. Нима учун мазкур жамоа ҳам, Италия ва Франция жамоалари ҳам Чемпионлар лигасида ғалаба қозона олмаяпти? Чунки айни дамда Испания клубларининг даври. Лекин ҳаммаси ўзгариб кетиши мумкин. Роналдунинг ҳам, Мессининг ҳам ёши ўтиб бормоқда. Уларнинг ўрнини кимдир боса оладими? Улар ўз фаолиятини якунлагач, бу давр ҳам тугайди”, - деди Фергюсон.