Goal nashri futbol olamidagi g‘alati va kulguga sabab bo‘luvchi qiyoslashlarni tuzib chiqdi.
Jo Koul - Lionel Messi – Stiven Jerard 2010 yilda “Liverpul” safiga tekinga kelib qo‘shilgan hamyurti haqidagi maqtovi haqida ba’zan afsuslanishi aniq. U shunchaki Jo Koulni Messidan ham yaxshi deb ta’riflagandi. Biroq, tarixni qaytarib bo‘lmaydi.
Muhammad Saloh - Lionel Messi – “Misrlik Messi” Salohni ham “Chelsi”ga kelmasidan oldin shunday atashardi. “Aristokratlar” safida o‘z o‘yinini topa olmagan “Misrlik Messi” hozirda “Roma”da ko‘ngildagidek o‘yin namoyish etmoqda, deyishimiz mumkin.
Jek Koulbek - Andrea Pirlo – vaqtida ko‘rsatgan chiroyli o‘yinlari bilan Angliya terma jamoasi safiga chaqirilgan Jekni 2013 yilda terma jamoa ustozi Roy Hojson “qizil Pirlo” deb atagandi. Hozirda “qizil Pirlo” Chempionshipda o‘z mahoratini toblamoqda.
Freddi Adu - Pele – ko‘rsatgan mahoratlari evaziga Pelega qiyoslangan Adu futboldagi professional faoliyatini yuqori notada boshlagandi. 2004 yilda “DC Yunayted” bilan shartnoma imzolagan 14 yoshli “amerikalik Pele” shu bilan yo‘q bo‘lib ketdi.
Loran Koselni - Fabio Kannavaro – fransiyalik himoyachi jamoaga endigina kelib qo‘shilgan vaqtida Arsen Venger uni “yangi Kannavaro” deb atagandi. Biroq, ikki himoyachining o‘xshashliklaridan ko‘ra farqlari ko‘proq bo‘lsa kerak.
Klaudio Della Penya - Franchesko Totti – “Roma”da yosh bo‘lishiga qaramasdan yuqori saviyasini ko‘rsatgan Della Penyani darhol “yangi Totti” deb atashdi. 2010 yilda 3-divizion vakili “Ternana”ga ijaraga berilganidan keyin “yangi Totti” ham yo‘qolib ketdi.
Fil Jons - Jon Terri/Franko Barezi/Dunkan Edvords – Fil Jonsni ko‘proq xorijlik hamkasblariga o‘xshatishgan. “Blekbern”dagi ustozi Stiv Kin uni Jon Terriga o‘xshatgandi, Fabio Kapello esa Franko Bareziga, Ser Aleks Fergyuson va Ser Bobbi Charlton uni “qizil iblislar” afsonasi Dunkan Edvords o‘xshatgandi. 25 yoshli Fil Jons esa hozirda ular ko‘rsatgan o‘yinni namoyish eta olganicha yo‘q.
Adama Traore - Messi/Ibrahimovich/Ronaldu – “Aston Villa” bu yosh futbolchini o‘z safiga qo‘shib olgan payti, klub bosh murabbiyi Tim Shervud Traore “Messi, Ibrohimovich, Ronaldu”larning birlashgan shakli deya ta’rif bergandi. Hozirda Premer Ligada 186 daqiqa o‘yin o‘tkazgan Traore o‘z hisobiga birorta gol ham yozib qo‘yolganicha yo‘q.
Jo Allen - Xavi – Brendan Rojers “Suonsi”dan “Liverpul” safiga kelib qo‘shilgan Allenni shunchaki “Uelslik Xavi” deb atadi. Hozirda Joning o‘yinlarini ko‘rib, Brendan Rojers qattiq adashganini fahmlagan bo‘lsa kerak.
Ueyn Runi - Pele – 2010 yilgi mundialdan oldin Runi yuqori sport formasida edi va Britaniya matbuoti tomonidan “oq tanli Pele” deb e’tirof etildi. Mundialda esa Runi terma jamoasi bilan omadsizlikka uchradi.
Gael Kakuta - Zidan – futbol olamida “yangi Zidan”lar talaygina topiladi. Kakuta ham shulardan biri. 2007 yili “Chelsi”ga kelib qo‘shilgan Kakuta o‘ta iqtidorli yosh futbolchi edi. Keyinchalik 6 klubga ijaraga berilgan Gael hozirda “Deportivo” safida to‘p surmoqda.
