O‘zbekiston milliy terma jamoasi Malakka shahridagi Hang Jebat Stadium maydoniga yetib keldi. Terma jamoa murabbiylar shtabi a’zosi Viktor Jalilov Suriyaga qarshi o‘yin oldidan o‘z fikrlarini qisqacha bildirib o‘tdi.
“So‘nggi saralash bosqichining ikkinchi davrasi ostonasida turibmiz. Birinchi davrada raqiblar bir-birini yaxshi o‘rgandi. Shundan kelib chiqqan holda har bir jamoa o‘z strategiyasini ishlab chiqqan”, – dedi Viktor Jalilov.
Viktor Jalilov Malayziyadagi issiq ob-havo o‘yin natijasiga ta’sir qilish-qilmasligi haqidagi savolga quyidagicha javob qaytardi.
“Albatta, issiq va nam ob-havo o‘yinga o‘z ta’sirini o‘tkazmasdan qo‘ymaydi. Hozir O‘zbekistonda havo bu darajada issiq emas. Shuning uchun bu yerdagi iqlimga ko‘nikishga harakat qildik”, – dedi tajribali mutaxassis.
