O‘zbekistonning birinchi raqamli raketkasi Denis Istomin, kecha AQSHning Florida shtati Mayami shahrida o‘tayotgan “Masters” seriyasiga kiruvchi nufuzli turnirning ilk bosqich bahsida rossiyalik Andrey Kuznesovga qarshi kortga chiqdi.

Qur’a natijalaridan so‘ng hamyurtimiz asosiy to‘rning birinchi bahsini o‘zi uchun qulay bo‘lgan raqibga qarshi o‘tkazishini ma’lum bo‘lgan edi. Sababi Istomin Kuznesovga qarshi o‘zaro ikki marta bahs olib borgan bo‘lsa, ikkalasida ham uni mag‘lub eta olgan edi. Biroq bu safar shunday bo‘lmadi. ATP reyting jadvalida Denisdan 2 pog‘ona yuqorida (68) borayotgan Andrey Kuznesov tennischimizni ikki set natijasiga ko‘ra mag‘lub eta oldi.

Denis har ikki setda ham Kuznesovga yetarlicha qarshilik ko‘rsata oldi. Birinchisida 4:6 hisobi qayd etilgan bo‘lsa, ikkinchi set tay-breykka qadar cho‘zildi va unda Kuznesov hamyurtimizga umuman imkoniyat qoldirmagan holda (0:7) uchrashuv g‘olibiga aylandi.

Shu tariqa Denis Istomin “Masters” turniridagi ishtirokini erta yakunlashga majbur bo‘ldi.