Yengilmas bokschimiz Qudratillo Abduqahhorov ertaga Singapur shahrida o‘zining navbatdagi muhim jangini o‘tkazadi.

Professional boksda 10ta jang o‘tkazib birortasida mag‘lub bo‘lmagan hamyurtimiz ularning 7tasini nokaut bilan yakunlagani diqqatga sazovor.

U ertaga Singapurdagi "OCBC Arena" sport majmuasida tashkil etiladigan boks kechasining asosiy jangida zimbabvelik Charlz Manyuchiga qarshi bahs olib boradi. Mazkur jang 12 raundga mo‘ljallangan bo‘lib, unda Abduqahhorov WBC Silver kamari uchun ringga ko‘tariladi.

2016 yilda O‘zbekiston chempioni bo‘lgan bokschimiz 2015 yil o‘zining professional boksdagi faoliyatini boshlagan edi.

Qudratillo o‘tgan yili filippinlik Adones Kabalkuintonga qarshi jang qilib, uni ochkolar bo‘yicha mag‘lubiyatga uchratgan edi. Aynan o‘shanda hamyurtimiz Osiyo kumush kamariga ega bo‘lgan edi. Mana endi Qudratillo jahon miqyosidagi kamar uchun jang qiladi.

Bokschimizning raqibi Charlz Maynuchi professional boksda 2009 yildan buyon faoliyat olib bormoqda va yetti yildirki hali mag‘lubiyatga uchragani yo‘q. U shuncha muddat davomida 20ta jang o‘tkazishga ulgurgan. Manyuchi 2016 yili rossiyalik bokschi Dmitriy Mixaylenkoni mag‘lub etgach WBC Silver kamarini qo‘lga kiritgan edi. Zimbabvelik bokschi mazkur kamardan tashqari WBC yo‘nalishining xalqaro chempionlik kamari sohibi va Afrika chempioni ham hisoblanadi.