Ispaniya futboli afsonalaridan biri Andres Inyesta klubda va terma jamoada barcha sovrinlarni yutib oldi. Biroq hech kim uning vorisi haqida o‘ylamayapti. “Barselona” yarim himoyachisi abadiy emas.

Bu mavsumda, Inyesta odatdagidan kamroq o‘ynamoqda. Bir necha marta tizzasi va boldiridan jarohat olib maydondan chetda qolib ketgan “sehrgar”ning ham yoshi o‘tib bormoqda. So‘nggi mavsumlada uning o‘yinida pasayish kuzatilganiga qaramay, “Barselona” a’zosi muxlislarga zavq bag’ishlay olmoqda.

Biroz vaqt muqaddam, Mundo Deportivo gazetasiga ko‘ra, Inyesta Ispaniya qiroli Filip II va qirolicha Letisiya tarafidan vatanini Yevropa maydonlarida munosib himoya qilgani uchun Ispaniyaning sharafli elchisi etib tayinlangan. Bu bilan 32 yoshli futbolchi ushbu sharafli unvonga loyiq ko‘rilgan eng yosh nomzodlardan biri bo‘ldi.

Klubdagi kelajagi so‘roq ostida

Hozirda terma jamoada Yevro-2008 g’oliblaridan faqatgina David Silva, Serxio Ramos va Andres Inyestalar qolgan. Biroq, Lopetegining terma jamoa bosh murabbiyi bo‘lganidan keyin, Fuentealbilyalik “afsungar” faqatgina ikki o‘yinni ilk daqiqalardan boshladi.

Klubda bilan 2018-yilda shartnomasi tugaydigan Inyesta haligacha shartnomasini uzaytirgani yo‘q. Klub rahbariyati esa uni faoliyatini yakunlagach, “Barselona” strukturalaridan birida ish boshlashini istamoqda. El Pais nashriga ko‘ra, Luis Enrike Inyestaga tanlash imkoniyatini berganini bildirib o‘tdi : “Faoliyating o‘z yakuniga yetib bormoqda, oldingda esa ikki tanlov bor, klubda qolish yoki Xavi kabi yangi tajribalarga hozir bo‘lish.” Klub esa unga munosib o‘rinbosar topishni zudlik bilan boshlashi kerak bo‘ladi. Biroq, Andresning o‘rnini to‘ldirish oson bo‘lmasligi aniq.