O‘zbekiston terma jamoasi bosh murabbiyi Samvel Babayan «Paxtakor» klubidan norozi ekanini ma’lum qildi.

"Tarkibda muammolar bor. Shu sabab O‘zbekiston klublariga e’tirozim bor. Masalan, «Paxtakor», «Bunyodkor». «Paxtakor»ning bir yo‘la uch futbolchisida jarohat bor edi: Igor Sergeev, Stanislav Andreev va Aleksandr Lobanov. Klublar bilan jiddiy ish olib borishimiz zarur" - dedi Babayan.

Jarohatlardan kafolatlanmagan futbolda klublar bilan aynan nima uchun jiddiy ish olib borish kerakligiga Samvel Babayan oydinlik kiritmagan. Avvalroq «Bunyodkor» klubi bosh murabbiyi Sergey Lushchan terma jamoa murabbiylari sabab Eldor Shomurodov xizmatidan yetarli darajada foydalana olmagani haqida aytib o‘tgadi.

Samvel Babayan suhbat davomida nima uchun jarohati bor futbolchilarni Qatarga qarshi o‘yinning asosiy tarkibiga kiritganiga izoh bermagan. Qayd etish kerak, Aleksandr Lobanov ham, Igor Sergeev ham asosiy futbolchilar sifatida harakat qildi.

Vaholanki mana shu jarohatli futbolchilarning o‘rnini bosishi mumkin bo‘lgan nomzodlar bor edi. Shulardan biri Qatar Yulduzlar ligasining olti o‘yinida 4 ta gol urishga muvaffaq bo‘lgan Temurxo‘ja Abduxoliqov.

Ma’lumot uchun, Igor Sergeev hal qiluvchi saralash bosqichining yetti o‘yinida maydonga tushib, birorta ham gol urolmadi.