O‘zbekiston terma jamoasi 28-mart kuni Qatar terma jamoasini mag‘lubiyatga uchratib, jahon chempionati saralash bahslarida o‘z imkoniyatini biroz bo‘lsada yaxshilib oldi.
Mazkur o‘yinda to‘liq ishtirok etgan Toshkentning «Bunyodkor» klubi yarim himoyachisi Eldor Shomurodovning o‘yindan keyingi fikrlari bilan qiziqdik.
Eldor Shomurodov (O‘zbekiston m.t.j. yarim himoyachisi):
- Avvalo, Suriya termasidan qabul qilingan mag‘lubiyatga qaramay, bizga ishonch bildirgan muxlislarga minnatdorchilik bildiraman. Ko‘p ming sonli hamyurtlarimiz stadionga tashrif buyurib, futbolchilarni qo‘llab-quvvatlab turishdi. g‘alabada ularning ham hissalari katta bo‘ldi. Ochig‘ini aytish kerak, Suriyadan qabul qilingan alamli mag‘lubiyatdan so‘ng qiyin bo‘lishini bilardik. Aksariyat muxlislar bizdan ranjishgandi. Ularning ishonchlarini qaytarish uchun faqat g‘alaba qozonishimiz shart edi. Guruhdagi vaziyatdan kelib chiqsak, bizni faqat 3 ochko qoniqtirardi. Muxlislarni biroz xushnud eta olgan bo‘lsak, bundan baxtiyormiz. Ha, chiroyli futbol namoyish etilmadi, lekin oxirigacha kurashib, yakunda kerakli g‘alaba qo‘lga kiritildi. Bilasizmi, biz futbolchilarga ijtimoiy tarmoqlarga kirish taqiqlangan. Bor e’tiborimiz o‘yinga qaratilgandi. Shunga qaramay, baribir, futbolchilar va murabbiylar manziliga bildirilgan tanqidlarni eshitdik. Bir tomondan, ularni to‘g‘ri qabul qildik. Muxlis borki, hamisha o‘z jamoasidan faqat g‘alaba kutadi. Ammo har doim ham yutuqqa erishib, ularni xushnud etishning iloji bo‘lavermaydi. Kuchli termalar va klublar ham mag‘lubiyatga uchrashadi. Har qanday holatda ham xato va kamchiliklardan to‘g‘ri xulosa chiqarib, keyingi uchrashuvlarda ularni takrorlamaslikka astoydil intilamiz.
