Qo‘shiqchi Timati Black Star kompaniyasi qoshida futbol klubiga asos solish niyatida, deb yozdi «Sports.ru». Bunda alohida futbol agentligi bo‘lishi ham ko‘zda tutilgan.
Kompaniya hammuassisi Pavel Kuryanovning aniqlik kiritishicha, loyihaning birinchi yili uchun 10 million rubl sarf etish rejalashtirilgan. Bu borada Black Star kompaniyasiga Rossiya futbol ittifoqi lisenziyasiga ega bo‘lgan mutaxassis ko‘maklashadi.
«Asosiy maqsadlarimizdan biri 3-5 yil ichida futbol jamoasiga asos solish. Uning nomi Black Star bo‘ladimi yoki shunchaki «Moskva», aniq to‘xtamga kelmaganmiz. Biz ortiqcha urinish yoki harakatlarsiz jamoani g‘arb prinsiplariga asosan shakllantirishni maqsad qilganmiz».
«Bizga eng muhimi kapitalizasiya hamda qiziqarli futbol. Davlat pullarini o‘zlashtirish yoki futbolchilarga belgilangan katta maoshlar ortidan pul yuvish kerak emas», — deb tushuntirish berdi Kuryanov.
Jamoa o‘z faoliyatini rasman qaysi mavsumdan boshlashi hozircha aniq emas.
