Argentina futboli afsonasi Diyego Maradona terma jamoa hujumchisi Lionel Messining FIFA tomonidan 4 o‘yinga diskvalifikasiya qilingani borasida fikr bildirdi.

"Messining jazosi ortiqcha. Amerika futbolida qo‘l bilan gaplashadilar. Messi bilan laynsmen o‘rtasida nima bo‘lgani qayd qilingan.

Messining yo‘qligi Boliviya bilan o‘yinda (0:2) hal qiluvchi rolni o‘ynadi. Bu Ronaldusiz qolgan Portugaliya kabidir.

Lionelning diskvalifikasiyasiga mening aralashganim haqidagi gaplar meni xafa qildi. Xudo ko‘rib turibdi, men hech narsani bilmagandim. Men surishtiruv boshladim. Hammasi KONMEBOLdan boshlangan.

FIFA prezidenti bilan bu borada gaplashib ko‘raman, chunki bu dahshat.

Men Messiga ko‘p qo‘ng‘iroq qildim, ammo javob olmadim. Leo ajoyib yigit, u hech narsadan shikoyat qilmaydi va mashq qilishda davom etaveradi", - deydi Maradona.