Xalqaro olimpiya qo‘mitasi rasmiy saytida chiqqan ma’lumotga ko‘ra, Pekin-2008 olimpiadasida yurtimiz sharafini himoya qilgan va erkin kurash musobaqasida oltin medalni qo‘lga kiritgan Artur Taymazovning erishgan natijasi bekor qilingan.

Taymazov topshirgan doping-namunalarda turinabol va stanozolol kabi taqiqlangan moddalar topilgan. Endi 120 kilogramgacha bo‘lgan vaznda finalda Artur Taymazovga yutqazib, kumush medal bilan taqdirlangan rossiyalik kurashchi Baxtiyor Ahmedov Pekin olimpiadasi chempioni hisoblanadi. Pekin-2008 bronza medali sohiblari slovakiyalik David Musulbes va qozog‘istonlik Marid Mutalimov edi.

Eslatib o‘tamiz, Pekin olimpiadasida yurtimiz qo‘lga kiritgan yagona oltin medalni aynan Artur Taymazov olib bergan edi.

Shuningdek, XOQ Pekin olimpiadasida 60 kg vaznda finalga chiqıb kumush medalni qo‘lga kiritgan ukrainalik Vasiliy Fedorishinning ham organizmidan turinabol topib, uni ham medaldan mahrum etgan. Bu vaznda bronza yaponiyalik Keniti Yumoto va eronlik Murod Muhammadiyga nasib etgan edi.

Afina-2004 olimpiadasida ham oliy shohsupaga ko‘tarilgan Taymazov Pekindan so‘ng London-2012 olimpiadasida ham oltin medalni qo‘lga kiritib, tarixda uchta oltin medalni qo‘lga kiritgan uchinchi kurashchi bo‘lgan edi: ungacha bunday natijaga Aleksandr Medved (1964, 1968, 1972) va Buvaysar Saytiyev (1996, 2004, 2008) erishishgan edi.