Bugun milliy chempionatimizning 5-tur o‘yinlari davom ettiriladi.

Jumladan, “ajdarlar” Olmaliqda “konchilar” jamoasi bilan bahs yuritadi. Bu uchrashuv ham yurtimiz futbol ishqibozlarining diqqat markazida turibdi. Uchrashuvga bo‘lgan qiziqish juda katta.

Bunga asosiy sabablardan biri, “Nasaf” g‘alaba qozonadigan bo‘lsa, yetakchilar orasida peshqadamga aylanadi.

“Olmaliq” – “Nasaf”, mazkur jamoalar o‘rtasidagi uchrashuv doimo qiziqarli va kurashlarga boy tarzda bo‘lgan. Bugun ham shunday uchrashuvga guvoh bo‘lamiz. Bundan faqat futbol ishqibozlari yutishi turgan gap.

Qolaversa, har ikkala jamoa tarkibida katta mahoratga ega futbolchilar faoliyat yuritishmoqda.

Bu jamoalarning o‘zaro uchrashuvlari tarixiga nazar tashlasak, shu paytgacha jamoalar o‘zaro 18 marta kuch sinashgan. Shundan o‘nta bahsda “ajdarlar” zafar quchgan, yana yettita o‘yinda durang natija qayd etilgan. Bitta o‘yinda olmaliqlik futbolchilar o‘z maydonida g‘alabaga erishishgan. To‘plar nisbati bo‘yicha ustunlik, “Nasaf” jamoasida: 31:16.

Bugungi uchrashuv Olmaliqda bo‘ladi. Bu qaysidir ma’noda konchilarga ustunlik berishi mumkin. Keling, Olmaliqda bo‘lib o‘tgan o‘zaro uchrashuvlarni esga olamiz, Demak, Olmaliqda bo‘lib o‘tgan to‘qqiz o‘yindan beshtasida durang qayd etilgan. Uch uchrashuvda “Nasaf” g‘alaba qozongan, bitta uchrashuvda “Olmaliq” g‘olib bo‘lgan. “Olmaliq” o‘z uyida so‘nggi bor, 2015 yili g‘alaba qozongan.

Ayni paytdagi “Olmaliq” jamoasi ustozi Viktor Kumikov avval “Nasaf” jamoasini ham boshqargan. Bu murabbiy o‘z o‘rnini ukrainalik mutaxasis A.Demyanenkoga bo‘shatib bergan edi. U paytlar R.Berdiyev unga eng yaqin ko‘makdosh bo‘lgan. Bugungi uchrashuv bir jamoada yonma-yon ishlagan ikki murabbiyning o‘zaro tuqnashuvi sifatida ham, muxlislarda qiziqishni ortirmoqda.