Malayziya chempionati bahslari o‘zining qizg‘in pallasiga kirib boryapti. Superliga bilan birga premyer-ligada ham o‘yinlar keskin kurashlarga boy tarzda o‘tyapti. Xabaringiz bor, bugungi kunda Malayziya chempionatining har ikki divizionida ko‘plab hamyurtlarimiz to‘p surishyapti.

Ular orasida tajribali yarim himoyachi Lutfulla To‘rayev ham bor. Kuni kecha «Terengganu» safida o‘ynayotgan ushbu le-gionerimiz bilan bog‘lanib, undan intervyu oldik.

- Lutfulla, jamoangizning natijalari qoniqarli bo‘lyaptimi?

- Umumiy olganda hammasi yaxshi, deya olaman. Turnir jadvalida 2-o‘rinni egallab turibmiz. Peshqadam «Nigeri Sembilan» klubidan 4 ochkoga ortda qolyapmiz. Bu jamoa 8ta o‘yinda 7ta g‘alaba va bitta durang qayd etgan.

- Bahslar oson kechmayotgandir?

- Har bir uchrashuvda o‘ziga yarasha qiyinchiliklar kuzatilyapti. Chunki 4-5ta o‘yinimiz mahalliy vaqt bilan soat 16:45da boshlanmoqda. Tabiiyki, kunning bu paytida havo harorati juda issiq bo‘ladi. Boz ustiga, namgarchilik ham yuqori.

- Jamoangizning qaysi o‘yini kutilmagan natija bilan yakunlandi?

- Birinchi tur uchrashuvini o‘z maydonimizda o‘tkazgandik. Bu o‘yin kuchli yomg‘ir yoqqanligi sabab 10-daqiqada to‘xtatilgandi. Yaqinda o‘sha bahs qayta o‘tkazildi. Afsuski, o‘z muxlislarimiz ko‘z o‘ngida raqibga 2:4 hisobida yutqazib qo‘ydik. O‘ylashimcha, mana shu o‘yin biz uchun kutilmagan natija bilan yakunlandi. Balki o‘sha uchrashuv o‘z vaqtida o‘tkazilganida hozir turnir jadvalida karvonboshilik qilayotgan bo‘larmidik...

- Chempionlik yo‘lida qaysi jamoalar sizlarga kuchli raqobatni yuzaga keltirishyapti?

- Birinchi o‘rindagi klubdan 4 ochkoga ortda qolyapmiz. Menimcha, hali hammasi oldinda. Vaziyatni ijobiy tomonga o‘zgartirish uchun imkoniyatimiz yetarli.

- Jamoangiz oldiga aniq vazifa qo‘yildimi?

- Ha. Chempionatda 1-o‘rinni egallab, superligaga chiqish.

- Malayziya chempionatidagi qolgan hamyurtlarimizning o‘yinlaridan ham boxabar bo‘lib boryapsizmi?

- Albatta. Farhod Tojiyev va Dilshod Sharofutdinov o‘ynayotgan jamoaning uy uchrashuvlarini bevosita stadionda ko‘rib boraman. Boisi, klublarimiz bitta shahar sharafini himoya qilishadi. Bizning o‘yinimiz ularnikidan bir kun oldin o‘tkaziladi. Shu bois ham har bir bahsda Dilshod va Farhodni stadion tribunalaridan turib qo‘llab-quvvatlayman.

- Ularning jamoalari biroz omadsiz qatnashayotgandek...

- Fikringizga qo‘shilaman. Asosiy tarkibning aksariyat o‘yinchilari jarohat olishgan. Maydonga optimal tarkib tushmayapti. Omadsiz ishtirokning asosiy sababi shu bo‘lsa kerak.

- Lutfulla, milliy jamoamiz aynan Malayziyada Suriya termasiga qarshi JCH-2018 saralash uchrashuvida maydonga tushdi. Sizga bu o‘yinni bevosita kuzatish nasib qildimi?

- Afsuski, yo‘q. Stadionga bora olmadim. Birinchidan, o‘sha payt jamoam bilan birga mashg‘ulot o‘tkazayotgan edik. Qolaversa, terma jamoamiz o‘yin o‘tkazgan shahar men yashayotgan hududdan ancha uzoqda joylashgan. Lekin jonli efirda tomosha qildim.

- O‘yin haqida qanday fikrdasiz?

- Menimcha, terma jamoamiz o‘ynagan stadion holati yaxshi emasdi. Boz ustiga, o‘sha kuni havo harorati juda yuqori bo‘ldi. Bir yarim yildan beri shu mamlakatda o‘ynayapman. Mahalliy iqlimga endi ko‘nikdim. Haqiqatan ham, o‘rganmagan futbolchilarga bunday sharoitda to‘p surish oson emas. Futbolchilarimiz shu tomondan qi-yinchilikka duch kelishdi. Natijada juda og‘ir o‘ynashdi.

- Lekin suriyaliklar ham shu maydonda, siz aytgan sharoitda o‘ynashdi-ku!

- To‘g‘ri. Ammo tan olaylik, Suriya terma jamoasi futbolchilarida g‘alabaga bo‘lgan ishtiyoq kuchliroq edi.

- Qatar termasiga qarshi Toshkentda kechgan o‘yinni ham ko‘rdingizmi? Bu uchrashuv sizda qanday taassurot qoldirdi?

- Ochig‘ini aytaman, ushbu bahsni ko‘rish nasib qilmadi. Chunki o‘sha kuni o‘rtoqlik o‘yinimiz bor edi. Hozirgi vaziyatda termamizning chiroyli futbol ko‘rsatib, yutqazganidan ko‘ra, g‘alaba qozongani afzalroq. Guruh bosqichining qolgan 3ta uchrashuvida qanday o‘yin namoyish etishdan qat’iy nazar, faqat zafar quchish kerak.

- Vaziyatga real qarasak, Eron termasi guruhda 1-o‘rin bilan JCHga chiqadi. Ikkinchi pog‘ona uchun kurash O‘zbekiston va Koreya jamoalari o‘rtasida kechadimi?

- Ha, mening taxminim ham xuddi shunday. Eron va Xitoy termalari bilan safarda o‘tkaziladigan o‘yinlar juda og‘ir kechadi. Lekin futbolchilar borlarini berib, Vatan uchun astoydil o‘ynashsa, istalgan raqibni mag‘lub etsa bo‘ladi. Hammasi ularning o‘z qo‘lida. Faqat yagona maqsad sari birlashib, hamjihatlikda harakat qilish kerak.