Tailandning Bangkok shahrida boks bo‘yicha o‘tkazilayotgan "Qirol kubogi-2017" xalqaro turnirida O‘zbekiston terma jamoasining to‘rt nafar a’zosi Hasanboy Do‘smatov, Elnur Abduraimov, Shahram G‘iyosov va Isroil Madrimov finalga yo‘llanma olgan edi.

O‘zbekiston terma jamoasi murabbiylar kengashi ushbu turnir 30 aprel - 7 may kunlari Toshkent shahri mezmonlik qiladigan Osiyo chempionatiga tayyorgarlik bosqichi bo‘lgani uchun jamoamizning eng tajribali bokschilari - Hasanboy Do‘smatov va Shahram G‘iyosovni final jangiga chiqarmaslikka qaror qildi. Chunki bu ikki bokschimiz nafaqat ushbu turnir davomida balki WSB turnirida "Uzbek Tigers" janglarida ham yuqori sport formasida ekanini namoyon etdi. Bundan tashqari, murabbiylar bokschilarni kutilmagan jarohat orttirib olishdan saqlashni ko‘zlamoqda.

64 kilogramm vazn toifasida ringga chiqayotgan Elnur Abduraimov esa tailandlik Vuttichai Masukka qarshi jang qiladi. Mezbonlar vakili Toshkentda o‘tkaziladigan Osiyo chempionatida qatnashadi va murabbiylarimiz bu bokschining imkoniyatlarini o‘rganishni Elnur uchun vazifa qilib qo‘ydi.

Shuningdek, Toshkentda bo‘ladigan Osiyo chempionati Germaniyada tashkil etiladigan jahon chempionatiga saralash vazifasini o‘taydi. Tailanddagi turnir finalida Isroil Madrimovga qarshi jang qiladigan kubalik Osley Iglesias Estrada o‘z vazn toifasida jahon chempionligiga da’vogar bokschilardan.

O‘zbekiston terma jamoasi murabbiylari Isroil Madrimov kubalik raqibining imkoniyatilarini o‘rganib olishi uchun uni ham final uchrashuviga qo‘ydi.

"Qirol kubogi-2017" turnirida ishtirok etishdan ko‘zlangan maqsad medallar jamg‘arish emas, aksincha qit’a miqyosidagi - Osiyo chempionatiga puxta tayyorgarlik ko‘rish, bokschilarning amaliyotini oshirish va raqiblar imkoniyatini o‘rganishdir.