«Yuventus» va «Barselona» o‘rtasidagi bahsdan keyin bugun Yevropa Chempionlar Ligasi g‘olibligiga da’vogar yana ikki jamoaning bahsiga guvoh bo‘lamiz – Myunxenda «Bavariya» «Real»ni qabul qiladi.

Goal nashri ushbu o‘yin uchun ham asosiy tarkiblarni taxmin qilib ko‘rdi.

«Bavariya» hujumchisi Robert Levandovski seshanba kungi mashg‘ulotlarda atigi 20 daqiqagina harakat qildi. Karlo Anchelotti polshalik hujumchi yelkasidagi og‘riqni his qilishda davom etsa uni maydonga tushirmasligini ma’lum qilgan. Shunday bo‘lgan taqdirda myunxenliklar hujumining old qismida Tomas Myuller maydonga tushadi. Uning ortida esa Riberi – Tiago Alkantara – Robben uchligi harakat qiladi.

Tayanch yarim himoyasini Xabi Alonso va Arturo Vidal ta’minlasa, himoyada Alaba – Boateng – Xavi Martines – Lam to‘rtligi harakat qilishi kutilmoqda. «Bavariya» darvozasini esa har doimgidek Manuel Noyer qo‘riqlaydi.

«Real» oldingi chizig‘ida esa Karim Benzemaning jismoniy holati bilan muammolar bor – u seshanba kunig mashg‘ulotlarda 40 daqiqa harakat qilgan. Fransiyalik hujumchi o‘yinga tayyor bo‘lmagan taqdirda uning o‘rnida Alvaro Morata harakat qiladi. Hujum qanotlarida jamoaning ikki eng qimmat futbolchisi – Ronaldu va Beyl maydonga tushishi shubhasiz.

Toni Kroos, Kazemiro va Luka Modrich madridliklarning o‘rta chizig‘ini tashkil etadi. «Real»nig himoya chizig‘i muammolardan holi emas – mudofaa markazidagi ikki futbolchida jarohat bor: Varan va Pepeda. Shu sababli Serxio Ramosga Nacho sheriklik qiladi. Chap qanotda Marselo o‘ynaydi, o‘ng qanotda esa «Atletiko» bilan o‘yindan keyin endi mashg‘ulotlarga qaytgan Dani Karvaxal harakat qilishi mumkin.