O‘zbekiston terma jamoasining sobiq hujumchisi, afsonaviy o‘zbek to‘purari Birodar Abduraimovning o‘g‘li Azamat Abduraimov hamda ukrainalik taniqli sport jurnalisti, tahlilchi, futbol statistikasi bo‘yicha bilimdon mutaxassislardan biri Viktor Yeryomin-Xoxlyuklarning fikricha, yaqin-yaqingacha terma jamoamiz sharafini himoya qilib kelgan hujumchi Maksim Shaskix Birodar Abduraimov nomidagi to‘purarlar klubiga a’zo qilib olinishi kerak va u bunga to‘la haqli.
Azamat Abduraimov (Birodar Abduraimov nomidagi o‘zbek to‘purarlari klubi a’zosi): - Maksimning nomi klub ro‘yxatidan chetda qolishi - bu qandaydir anglashilmovchilik. Menimcha, u klub a’zoligiga haqli va buning uchun barcha talablarni bajargan. O‘rni kelganda ta’kidlashim kerak, men ham shu klub a’zosi sanalaman hamda bundan faxrlanaman. E’tibor bering, taqdir taqozosi bilan to‘rtta chempionatda tup surib, ko‘plab gollar urdim. Maksimda ham xuddi shunday bo‘lgan. Birgina Maks emas, bir qator o‘zbek futbolchilari xorij chempionatlarida gol muallifi bo‘lishgan. Demak, yakuniy natijalar hisoblanayotgan paytda buni ham alohida e’tiborga olish zarur. Xullas, mazkur klub haqidagi g‘oya muallifi bo‘lmish Vladimir Ashotovich Safarov bilan bog‘lanib, Birodar Abduraimov nomidagi o‘zbek to‘purarlari klubiga ba’zi juz’iy o‘zgartirishlar kiritish borasida gaplashish kerak.
Viktor Yeryomin-Xoxlyuk: - Mazkur masala bo‘yicha Azamatning fikriga to‘la-to‘kis qo‘shilaman. Sababi, mening hisob-kitoblarimga ko‘ra, Maksim Shaskix klublar miqyosidagi turli rasmiy o‘yinlar va turnirlarda jami 183ta golga mualliflik qilgan. Endi oddiy arifmetikadan foydalanib, bu natijaga O‘zbekiston terma jamoasi libosida urilgan yana 34ta golni qo‘shamiz. Demak, jami gollar soni - 217ta. Bu esa tabiiyki, klubga qabul qilinish uchun talab qilinganidan 17ta gol ortiq, degani. Ammo bu haqda avval to‘purarlar klubi reglamentiga ham bir nazar solib chiqish kerak. Umuman olganda, ayni paytda faoliyat yuritayotgan yana boshqa futbolchilar haqida ham savollar yig‘ilib qolgan...
Birodar Abduraimov nomidagi o‘zbek to‘purarlari klubi
Reglament: Mazkur ramziy klubga o‘zbek futbolidagi faoliyati davomida 200tadan ko‘p gol urgan, O‘zbekiston fuqarosi hisoblangan futbolchilar qabul qilinadi. Klub Toshkentning «Paxtakor» jamoasida to‘p surgan afsonaviy o‘zbek futbolchisi Birodar Abduraimov nomi bilan yuritiladi. Unga 2001 yili O‘zbekiston futbol federasiyasi tomonidan asos solingan.
21.05.2016 holatiga ko‘ra (Vikipediya ma’lumotlariga asosan)
№. Futbolchi O‘CH O‘K TJ XO‘ Jami
1. Ravshan BOZOROV 264 32 6 14 316
2. Igor SHKVIRIN 231 21 21 12 285
3. Ja’far IRISMETOV 210 31 18 15 274
4. Azamat ABDURAIMOV 162 17 39 40 258
5. Yuriy SARKISYAN 223 - - 18 241
6. Pyotr AGEEV 220 6 - 2 228
7. Birodar ABDURAIMOV 151 15 23 32 221
8. Rustam DO‘RMONOV 171 40 4 1 216
9. Furqat ESONBOYEV 214 - - - 214
10. Mirjalol QOSIMOV 112 39 46 13 210
11. Oybek USMONXO‘JAYEV 163 31 2 9 205
12. Gennadiy KRASNISKIY 142 9 14 32 197
