Ўзбекистон терма жамоасининг собиқ ҳужумчиси, афсонавий ўзбек тўпурари Биродар Абдураимовнинг ўғли Азамат Абдураимов ҳамда украиналик таниқли спорт журналисти, таҳлилчи, футбол статистикаси бўйича билимдон мутахассислардан бири Виктор Ерёмин-Хохлюкларнинг фикрича, яқин-яқингача терма жамоамиз шарафини ҳимоя қилиб келган ҳужумчи Максим Шацких Биродар Абдураимов номидаги тўпурарлар клубига аъзо қилиб олиниши керак ва у бунга тўла ҳақли.

Азамат Абдураимов (Биродар Абдураимов номидаги ўзбек тўпурарлари клуби аъзоси): - Максимнинг номи клуб рўйхатидан четда қолиши - бу қандайдир англашилмовчилик. Менимча, у клуб аъзолигига ҳақли ва бунинг учун барча талабларни бажарган. Ўрни келганда таъкидлашим керак, мен ҳам шу клуб аъзоси саналаман ҳамда бундан фахрланаман. Эътибор беринг, тақдир тақозоси билан тўртта чемпионатда туп суриб, кўплаб голлар урдим. Максимда ҳам худди шундай бўлган. Биргина Макс эмас, бир қатор ўзбек футболчилари хориж чемпионатларида гол муаллифи бўлишган. Демак, якуний натижалар ҳисобланаётган пайтда буни ҳам алоҳида эътиборга олиш зарур. Хуллас, мазкур клуб ҳақидаги ғоя муаллифи бўлмиш Владимир Ашотович Сафаров билан боғланиб, Биродар Абдураимов номидаги ўзбек тўпурарлари клубига баъзи жузъий ўзгартиришлар киритиш борасида гаплашиш керак.

Виктор Ерёмин-Хохлюк: - Мазкур масала бўйича Азаматнинг фикрига тўла-тўкис қўшиламан. Сабаби, менинг ҳисоб-китобларимга кўра, Максим Шацких клублар миқёсидаги турли расмий ўйинлар ва турнирларда жами 183та голга муаллифлик қилган. Энди оддий арифметикадан фойдаланиб, бу натижага Ўзбекистон терма жамоаси либосида урилган яна 34та голни қўшамиз. Демак, жами голлар сони - 217та. Бу эса табиийки, клубга қабул қилиниш учун талаб қилинганидан 17та гол ортиқ, дегани. Аммо бу ҳақда аввал тўпурарлар клуби регламентига ҳам бир назар солиб чиқиш керак. Умуман олганда, айни пайтда фаолият юритаётган яна бошқа футболчилар ҳақида ҳам саволлар йиғилиб қолган...

Биродар Абдураимов номидаги ўзбек тўпурарлари клуби

Регламент: Мазкур рамзий клубга ўзбек футболидаги фаолияти давомида 200тадан кўп гол урган, Ўзбекистон фуқароси ҳисобланган футболчилар қабул қилинади. Клуб Тошкентнинг «Пахтакор» жамоасида тўп сурган афсонавий ўзбек футболчиси Биродар Абдураимов номи билан юритилади. Унга 2001 йили Ўзбекистон футбол федерацияси томонидан асос солинган.

21.05.2016 ҳолатига кўра (Википедия маълумотларига асосан)

№.  Футболчи                          ЎЧ       ЎК      ТЖ     ХЎ      Жами

1.    Равшан БОЗОРОВ             264      32      6         14       316

2.    Игорь ШКВИРИН               231      21      21       12       285

3.    Жаъфар ИРИСМЕТОВ       210      31      18       15       274

4.    Азамат АБДУРАИМОВ       162      17      39       40       258

5.    Юрий САРКИСЯН              223      -         -         18       241

6.    Пётр АГЕЕВ                       220      6        -         2         228

7.    Биродар АБДУРАИМОВ    151      15      23       32       221

8.    Рустам ДЎРМОНОВ           171      40      4         1         216

9.    Фурқат ЭСОНБОЕВ           214      -         -         -          214

10.   Миржалол ҚОСИМОВ        112      39      46       13       210

11.   Ойбек УСМОНХЎЖАЕВ      163      31      2         9         205

12.   Геннадий КРАСНИЦКИЙ   142       9          14        32        197