Oliy liganing 6-turida "Metallurg" - "Navbahor" o‘yini o‘tkazildi.
Bekoboddagi uchrashuv kuchli shamol ostida boshlandi. Dastlabki daqiqalardan chempionatda peshqadamlardan biri bo‘lib turgan “Navbahor” poytaxt viloyatiga katta niyatlar bilan kelganligini yashirmadi. Ammo o‘yin mezbonlarning tashabbusi ostida o‘tdi.
Uchrashuvning 25-daqiqasida “Metallurg” hisobni ochishimi mumkin edi. Darvozabon to‘pni chap qanotga tashlab berdi. Abdumo‘minov – Qodirqulov – Magerramov kombinasiyasidan keyin to‘p 11 metrlik belgi yaqiniga yetkazib berildi. Dilmurod Karimovning zarbasi biroz noaniq bo‘ldi.
33-daqiqada Vusol Magerramovning xatosidan mehmonlar foydalanishiga bir bahya qoldi. Oradan ikki daqiqa o‘tib Azizbek Turg‘unboyevning bosh bilan bergan zarbasidan keyin Zafar Safayev to‘pni ushlab oldi.
Birinchi taymning so‘nggi daqiqalari mezbonlarning katta ustunligi ostida o‘tdi, ammo darvozalar dahlsizligi saqlab qolindi – 0:0.
Ikkinchi taym bekobodliklarning ketma ket hujumlari bilan boshlandi. Birgina Alisher Samatov o‘z darvozasi chizig‘i ustidan ikki marta to‘pni qaytarishga muvaffaq bo‘ldi. Jahongir Abdumo‘minov, Zohid Abdullayev, Murodjon Toshmatovlar qulay vaziyatlardan foydalana olishmadi. 58-daqiqada Magerramov – Sulaymonov kombinasiyasidan so‘ng Zohid Abdullayev darvozani nishonga olishga urindi. To‘p darvoza ustuni yonginasidan o‘tib ketdi.
66-daqiqada mehmonlar burchakdan to‘pni o‘yinga kiritishdi. Mansur Saidov yetkazib bergan to‘pni Hasanboy Ergashev boshi bilan darvoza tomon yo‘naltirdi. Zarba noaniq chiqdi.68-daqiqada mezbonlar tarkibida Doniyor Ismoilov maydonga chiqarildi. U tushishi bilan jamoaning hujumida ishtirok etdi va chap qanotdan jarima maydoniga yorib kirdi va zarba berdi. Darvozabon to‘pni egallab oldi. 71-daqiqada Ayubxon No‘’monov uzatgan to‘pni Zohid Abdullayev boshi bilan darvozaga to‘g‘rilab qo‘ygandi. Zarba biroz noaniq bo‘ldi.
78-daqiqada “Navbahor” futbolchilari jarima zarbasini amalga oshirishganda Ro‘zimboy Ahmedov boshi bilan to‘pning yo‘nalishini o‘zgartirdi. Ammo to‘p darvoza ustuni yonginasidan o‘tib ketdi. Shu daqiqaning o‘zida mezbonlarning hujumi navbahorchilar tomonidan o‘yin qoidasining buzulishi bilan tugadi. Jarima zarbasini Dilmurod Karimov bajardi. Mehmonlar posboni Asilbek Omonov jamoasini muqarrar goldan saqlab qoldi.
O‘yinning oxirgi daqiqalarigacha mezbonlar hujumga zo‘r berishdi. Ammo “Navbahor” durang natijani saqlab qoldi.
Oliy liga. 6-tur.
15 aprel (shanba)
«Metallurg» (Bekobod) – «Navbahor» (Namangan) 0:0
Hakamlar: H. Ro‘ziyev (Toshkent), O. Abduvosilov (Toshkent), S. Shoyusupov (Toshkent), O. To‘ychiboyev (Farg‘ona)
Nazoratchi: S. Najafaliyev (Toshkent).
O‘zPFL vakili: N. Lutfulin.
“Metallurg”: 1. Zafar Safayev, 3. Vusol Magerramov, 4. (s) Hikmat Hoshimov, 6. Dilmurod Karimov, 7. Doniyor Odilov (8. Ayubxon No‘’monov, 58), 11. Murodjon Toshmatov, 13. Sanjar Qodirqulov (77. Doniyor Ismoilov, 68), 15. Zohid Abdullayev, 17. Mirg‘iyos Sulaymonov, 40. Islomjon Qobilov, 70. Jahongir Abdumo‘minov (95. Timur Usmonov 75).
“Navbahor”: 30. Asilbek Amonov, 2. Alisher Samatov, 3. Hasanboy Ergashev, 5. G‘iyosjon Komilov, 9. Dilshod Jabborov, 19. Mirzohid G‘afurov, 21. A’zamjon Aliyev, 32. Jahongir Mehmonov, 44. Darko Stanoyevich (10. Mansurjon Saidov, 46), 77. Azizbek Turg‘unboyev (22. Ro‘zimboy Ahmedov, 56), 84. Nemenya Yovanovich.
Ogohlantirishlar: G‘iyosjon Komilov (5), Musrodjon Toshmatov (23), Nemanya Yovanovich (32), Jahongir Mehmonov (54), A’zamjon Aliyev (58).
