«Lokomotiv» hamda «Istiqlol» (1:1) klublari o‘rtasida kechgan OCHL 4-tur bahsidan so‘ng «temiryo‘lchilar» himoyachisi Bobur Yo‘ldoshevdan intervyu oldik. E’tiborlisi, mehmonlar u maydondan chiqib ketganidan so‘ng darvozamizni ishg‘ol qilishgandi.
- Bobur, bugungi uchrashuvning ahamiyati «Lokomotiv» uchun juda yuqori edi. Lekin jamoangiz kutilgan natijani qayd eta olmadi. Buning sabablarini qanday izohlaysiz?
- O‘yin ahamiyatining yuqori ekanligini barchamiz yurakdan his qilib turgandik. Bahs qiyin kechishini bilardik. Lekin har doim ham o‘ylagan narsangiz amalga oshavermas ekan. Qolaversa, raqib juda kuchli edi. Ikkinchi bo‘limda natijani ushlab qolishga intildik. Bu esa bizga pand berdi.
- Xolis aytganda, bugungi natija o‘yinga mos bo‘ldimi?
- Yo‘q, g‘alaba qozonishimiz kerak edi. Aytib o‘tganimdek, natijani saqlab qolish payida bo‘ldik. Mabodo ertaroq gol o‘tkazib yuborganimizda, ishonchim komil, raqib darvozasini yana ishg‘ol qilardik. Shunday bo‘lsa ham so‘nggi daqiqada g‘alaba to‘pini kiritishga juda yaqin kelgandik. Afsuski, imkoniyatdan foydalana olmadik. Mayli, bu - futbol. Oldindan qanday natija bo‘lishini hech kim bilmaydi.
- To‘g‘riku-ya, lekin birinchi bo‘lim o‘rtalaridan keyin tashabbusni deyarli raqibga berib qo‘ydinglar. Bunga juda ham erta emasmidi?
- Ha, to‘g‘ri. Lekin uchrashuv avvalida yaratilgan vaziyatlardan unumli foydalanganimizda, o‘yin umuman boshqacha hisob bilan yakunlanardi. Bizga ochko ko‘proq kerak bo‘lgani uchun tavakkal qila olmasdik.
- Bahs oldidan murabbiylar qanday ko‘rsatma berishgandi?
- Albatta, hujumkor futbol namoyish etishimiz so‘ralgandi. Ijobiy natijaga erishish uchun raqib darvozasini ishg‘ol qilishimiz kerak edi. Gol urdik, lekin so‘nggi daqiqalarda o‘z darvozamizdan ham to‘p olib chiqishga majbur bo‘ldik. Bu esa juda alamli edi.
- Ikkinchi bo‘limdagi bosimdan keyin raqib baribir, qaysidir epizoddan foydalanishi aniqqa o‘xshab qolgandi. Bunday vaziyatda eng yaxshi himoya - hujum, deyishadi...
- Fikringizga yuz foiz qo‘shilaman. Murabbiylar ikkinchi bo‘limda qarshi hujumga ko‘proq e’tibor qaratishimizni so‘rashgandi. Ammo oldingi chiziqdagi ishlarimiz yurishmadi.
- «Istiqlol» guruhdagi eng kuchli jamoami?
- Menimcha, kvartetimizda kuchsiz klubning o‘zi yo‘q. Hammada guruhdan chiqish uchun imkoniyat bor. Kurash so‘nggi daqiqalargacha davom etadi. Bir narsani ishonch bilan ayta olaman, «Istiqlol»ni bemalol mag‘lub etsak bo‘lardi. Afsuski, yuzaga keltirilgan qulay vaziyatlardan foydalana olmadik. Qolaversa, omad ham yetishmadi. Mayli, shunday bo‘lishi kerak ekan.
- Ochig‘i, o‘tkazib yuborilgan golda kimnidir ayblash qiyin. Himoyachilarimiz o‘yindan tashqari holat bo‘ldi, deb o‘ylashdi. Bu borada shaxsiy fikringiz qanday?
- E’tibor bergan bo‘lsangiz, qanot hakami o‘sha vaziyatda avval bayroqchasini ko‘tardi, keyin esa birdaniga tushirdi. Ushbu holat futbolchilarni ikkilantirib qo‘ydi. Nima ham derdik, bu bilan hayot to‘xtab qolmaydi. Xatoni to‘g‘rilash uchun oldinda o‘yinlar bor. Vaziyatni ijobiy tomonga o‘zgartirishga astoydil harakat qilamiz. Ishlashda davom etamiz. Shaxsiy fikrim, hamma futbolchilar jonlarini berib o‘ynashdi. Hech kim o‘yinga yuzaki yondashgani yo‘q.
- «Sho‘rtan»dan qabul qilingan mag‘lubiyat futbolchilarning ruhiyatiga salbiy ta’sir o‘tkazmadimi?
