Professional boksdagi faoliyatini ishonchli g‘alaba bilan boshlagan hamyurtimiz Fazliddin G‘oyibnazarovning navbatdagi jangi qachon va qayerda o‘tkazilishi ma’lum bo‘ldi.
Unga ko‘ra, Rio Olimpiadasi chempioni 20 may kuni professional boksdagi ikkinchi jangini o‘tkazadi. Fazliddin shu kuni AQSHning Nyu-York shahridagi dunyoga mashhur “Medison Skver Garden” arenasida ringga ko‘tariladi.
Hozircha G‘oibnazarovning raqibi aynan kim bo‘lishi ma’lum emas. Fazliddinning murabbiyi Abror Tursunpo‘latovning xabar berishicha, yaqin bir hafta ichida raqib nomiga oydinlik kiritiladi. Mashg‘ulotlar esa ertaga boshlanadi.
Ma’lumot uchun, Nyu-Yorkdagi boks oqshomining markaziy jangi amerikalik ikki yo‘nalish chempioni Terens Krouford ishtirokida bo‘lib o‘tadi.
Eslatib o‘tamiz, Fazliddin G‘oyibnazarov AQSHning Kaliforniya shtati Karson shahrida bo‘lib o‘tgan ilk jangida amerikalik Viktor Vaskesni ikkinchi raunddayoq texnik nokautga uchratgan edi.
